Rusiya-Polşa arasında diplomatik gərginlik yaşanır. Varşavanın Rusiyanın diplomatik mülkiyyəti ilə bağlı tədbirlər görəcəyi təqdirdə, Moskvanın Polşaya qarşı cavab addımları atacağı bildirilib. Rusiya prezidentinin mətbuat katibi Dmitri Peskov Polşanın hər hansı addımlar atacağı halda cavab tədbirlərinin qaçılmaz olduğunu qeyd edib.

Maraqlıdır, Rusiya hansı addımı ata bilər? Putin yeni cəbhə açmaq iqtidarındadırmı?

Mövzu ilə bağlı Sfera.az-a açıqlamasında siyasi şərhçi Məhəmməd Əsədullazadə bildirdi ki, Polşa-Rusiya əlaqələrinin əsas gərginləşmə səbəbi Rusiya-Ukrayna müharibəsidir. Onun sözlərinə görə, Polşa Ukraynaya hərbi yardımlar edir, bu da Rusiyanı narahat etməyə bilməz.

M.Əsədullazadə qeyd etdi ki, Rusiya və Polşa əlaqələri tarixin ən gərgin vaxtlarını yaşayır:

“Tərəflər arasında təkcə siyasi deyil, iqtisadi, təhlükəsizlik və hərbi sahədə də çox ciddi və dərin problemlər var. Polşa Rusiyaya qarşı sanksiyaların davam etdirilməsində mühüm rol oynayan ölkədir. Həmçinin Polşa Rusiyaya Ukrayna cəbhəsində də çox ciddi şəkildə problemlər yaradır”.

Politoloq bildirdi ki, Rusiyanın imkanı olsa, Polşaya qarşı hərbi əməliyyatlar da keçirə bilər:

“Rusiya Polşanı demək olar ki, düşmən kimi görür. Varşava diplomatik mülkiyyəti ilə bağlı Rusiyaya qarşı hərəkət etsə, Moskvanın buna qarşı cavab tədbirləri olacaq. Rusiyanın hərbi imkanları genişlənər və Ukraynada qalib gələrsə, Polşaya qarşı müəyyən hərbi təhdidlər və yeni cəbhə açıla bilər. Polşa NATO-nun üzvüdür. Bu addım Rusiya-NATO qarşıdurmasına da gətirib çıxara bilər”.

M.Əsədullazadə sonda vurğuladı ki, indiki mərhələdə Rusiyanın Polşaya qarşı hər hansısa hərbi əməliyyat keçirməsi və yeni cəbhə açması gözlənilmir.

Firuzə Əliyeva

"Rusiya bu halda Polşaya qarşı yeni cəbhə aça bilər..." - AÇIQLAMA