"Konstitusiya və reytinqi..." - Makron üçüncü dəfə prezident seçilə bilərmi?

Fransanın "Vətənpərvərlər" partiyasının lideri Florian Filippo Prezident Emmanuel Makronun üçüncü prezidentlik müddətinə namizədliyini irəli sürmək üçün Konstitusiya Şurasının sədri vəzifəsinə Riçard Ferranı təyin etməklə dövlət çevrilişinə hazırlaşdığını iddia edib.

 
Maraqlıdır, Makron üçüncü dəfə prezident seçilə bilərmi?

Mövzu ilə bağlı Sfera.az-a açıqlama verən politoloq Elxan Şahinoğlu bildirib ki, Makronun üçüncü dəfə prezident seçilmə şansı yoxdur. 

Onun sözlərinə görə, buna həm konstitusiya, həm də Makronun reytinqi imkan vermir:

“O, ikinci dəfə də güclə seçilmişdi. Son illərdə reytinqi olduqca aşağı düşüb. Keçirilən son sorğular da bundan xəbər verir. Makronun reytinqinin aşağı olması parlament seçkilərində onun partiyasının səsləri itirməsi ilə də nəticələndi. Höküməti formalaşdırmaqda çox əziyyət çəkdi. Baş nazir təyin etdi, bir neçə ay sonra parlament səsvermədə bunu təsdiq etmədi. Buna görə də Makron və onun ətrafı konstitusiyanı dəyişib səlahiyyət müddətini uzatmaq istəsə də, buna nail olacağına inanmıram”.

E.Şahinoğlu qeyd edib ki, Fransada müxalif qüvvələr Makrona istefa verməsi üçün təzyiq edir:

“Fransada müxalif qüvvələr güclüdür. Onların Makrona təzyiqi də son illər artıb. Əksinə, Makrona məsləhət görürlər ki, istefa versin və növbədədənkənar prezident seçkiləri təyin olunsun. Bu baxımdan, əgər Makronun reytinqi yüksək olsa idi, konstitusiyanı dəyişib üçüncü müddətə prezident seçilə bilməsini təmin edə bilərdi. Reytinqinin aşağı olması və höküməti formalaşdıra bilməməsinə görə onun üçüncü dəfə prezident olmaq ehtimalı çox azdır”.

Firuzə Əliyeva