"Qərb üçün girib diktə edə bilmədiyi bütün mətbəxlər çirklidir..." - Millət vəkili
“Bu gün xeyli sayda dövlət, o cümlədən keçmiş sovetlər məkanında bir sıra subyektlər tam müstəqilliyə və suverenliyin bərpasına qədərki yolda Azərbaycan prezidentinin illər əvvəl əldə etdiyi nəticələrə nail olmaq üçün hələ indi mücadiləyə start veriblər”.
Sfera.az xəbər verir ki, bunu Milli Məclisin bugünkü iclasında deputat Bəhruz Məhərrəmov deyib.
O qeyd edib ki, Prezident İlham Əliyevin mübarizəsi heç kimin gözləmədiyi çox mürəkkəb periodları əhatələyib:
“Avropaya vizasız gedib-gəlmək idealları ilə yaşayanların əksinə, Azərbaycan potensialını sonrakı dövrdə müstəqillik və suverenliyimizin qarantına çevriləcək layihələrə yönəltdi. İllər sonra, bir vaxtlar vizasız Avropa idealları ilə öyünənlər indi artıq başa düşməyə başlayıblar ki, əslində müstəqilliklərini 60 avroluq viza rüsumuna qurban veriblər. Nəticədə bir çox coğrafiyalarda hələ də işğal və təcavüz, o cümlədən separatizm və münaqişələrin çiçəkləndiyi bir şəraitdə, Azərbaycan cənab İlham Əliyevin zamanında verdiyi doğru yön sayəsində bu problemləri illər əvvəl arxada qoya bilib.
Bir vaxtlar cənab İlham Əliyevin enerji və nəqliyyat layihələrinə qarşı çıxanlar artıq həmin layihələrin faktiki benefisiarlarına çevriliblər və ən azı elə bu fakt Azərbaycanın regionda əməkdaşlığın və təhlükəsizliyin qarantoru funksiyasını üstləndiyini göstərir.
B.Məhərrəmov qeyd edib ki, AŞPA-nın Azərbaycanın ardınca Gürcüstanla da münasibətlərini qoparmasının əsas bir səbəbi var:
“Bu, onu göstərir ki, Qərb üçün girib diktə edə bilmədiyi bütün mətbəxlər çirklidir, Qərbin marionetinə çevrilməyən bütün liderlər avtoritar, ölkələr isə qeyri demokratikdir. Azərbaycan cəmiyyəti buna açıq gözlə baxmalıdır və son bir il ərzində baş tutmuş prezident, parlament və bələdiyyə seçkiləri də göstərir ki, xalqımız bu reallığın fərqindədir”.
Firuzə Əliyeva
