"Rusiyaya qarşı sanksiyalara veto qoyacağıq" - Siyarto
Aİ tələblərini yerinə yetirməsə, Macarıstan mart ayında sanksiyalara veto qoyacaq.
Sfera.az xəbər verir ki, bu barədə Macarıstanın xarici işlər naziri Peter Siyarto açıqlama verib.
Onun sözlərinə görə, Brüssel və Kiyevin enerji təhlükəsizliyi sahəsində Budapeştin tələblərini yerinə yetirməməsi halında, Macarıstan mart ayında Aİ-nin Rusiya vətəndaşlarına və Rusiya şirkətlərinə qarşı fərdi sanksiyalarının uzadılmasına veto qoyacaq.
O, Aİ-nin öhdəliklərini yerinə yetirib-yetirməməsinə ciddi nəzarət etmək niyyətində olduğunu təsdiqləyib.
"Keçən bazar ertəsi biz Avropa Komissiyasından Ukraynanın Macarıstanın və Mərkəzi Avropanın enerji təhlükəsizliyini təhdid etməməsini təmin edəcəyinə dair təminat aldıq. Əgər Avropa Komissiyası sözünün üstündə durmasa və Ukraynanı Macarıstanın enerji təhlükəsizliyini təmin edən tədbirlər görməyə məcbur edə bilməzsə, sanksiyalarla bağlı növbəti qərar qəbul edildikdə, onlar bunun üçün məsuliyyət daşımalı olacaqlar. Aydındır ki, sanksiyalarla bağlı növbəti səsvermədə bizim mövqeyimiz Avropa Komissiyasının sözünün üstündə durub-tutmamasından asılı olacaq. Ukraynalılar Avropa Komissiyasına verdiyi vədləri yerinə yetirirlər”, - XİN rəhbəri bildirib.
Siyarto bir daha vurğulayıb ki, Macarıstan Ukraynanın Mərkəzi Avropa ölkələrinin enerji təhlükəsizliyini təhdid edən hərəkətlərini və eyni zamanda, Aİ rəhbərliyinin vəziyyətlə bağlı heç bir addım atmamasını qəbuledilməz hesab edir.
Qeyd edək ki, keçən ilin payızında Aİ Şurası böyük bir qrup Rusiya fiziki və hüquqi şəxslərinə qarşı fərdi sanksiyaları 2025-ci il martın 15-dək uzadıb. Məhdudiyyətlər 2000-dən çox Rusiya vətəndaşı və Rusiya şirkətini hədəf alır. Sanksiyalara Aİ-yə səyahət qadağaları, aktivlərin dondurulması və bu şəxslər və ya şirkətlərlə biznes fəaliyyətinin qadağan edilməsi daxildir.
Firuzə Əliyeva
