Azərbaycan XİN-ə ABŞ-dən deport olunan azərbaycanlılar barədə məlumat verilib? - Rəsmi AÇIQLAMA
ABŞ-nin Miqrasiya və Gömrük Xidmətinin (ICE) 2024-cü ilin noyabrında tərtib etdiyi deportasiya olunacaq şəxslərin siyahısına 709 Azərbaycan vətəndaşı da daxil edilib.
Məlumata görə, siyahıya ABŞ-də olan 1,4 milyon qeyri-qanuni miqrant daxildir. Ədliyyə Nazirliyinin miqrasiya məhkəməsi tərəfindən onların deportasiyası barədə qərar qəbul edilib. Lakin onlar hələ də ABŞ-dədirlər və həbsdə deyillər.
Maraqlıdır, vətəndaşlarımızın deportasiya edilməsi ilə əlaqədar Azərbaycan hökumətinə rəsmi məlumat verilibmi? Azərbaycanın ABŞ-dəki səfirliyi və konsulluqları deportasiya olunacaq şəxslərlə bağlı hər hansı tədbirlər görürmü?
Mövzu ilə bağlı Sfera.az-ın əməkdaşı Azərbaycan Respublikası Xarici İşlər Nazirliyinə (XİN) sorğu ünvanlayıb.
Nazirliyin Mətbuat Xidməti İdarəsinin rəisi Ayxan Hacızadə saytımıza bildirib ki, bu barədə hər hansısa şərh verilməyəcək.
Qurum rəsmisi qeyd edib ki, açıqlama olduğu təqdirdə məlumat təqdim olunacaq.
Xatırladaq ki, ABŞ Miqrasiya Xidməti hətta qəti deportasiya qərarı olsa belə, nəzarət altında olan, lakin həbsdə olmayan şəxslərin dərhal deportasiyasına mane olan çoxsaylı amillərin mövcudluğunu etiraf edib.
Fidan
