Xəbər verdiyimiz kimi, Türkiyə Prezidenti Rəcəb Tayyib Ərdoğan Azərbaycana səfər edəcək. Türkiyənin Azərbaycandakı səfiri Cahid Bağçının ötən günlərdə verdiyi məlumata əsasən, ölkə başçısı Xocalıya gələcək.

Bununla bağlı Sfera.az-a açıqlama verən politoloq Elxan Şahinoğlu deyib ki, Ərdoğanın gələn ay Azərbaycana planlaşdırılan səfəri həssas dövrə təsadüf edəcək. Onun sözlərinə görə, Rusiya və İranın ölkəmizə qarşı təxribatlarının artdığı dövrdə Türkiyə ilə strateji müttəfiqliyin üst səviyyəyə qaldırılması vacibdir.

“Bu həm də qardaş ölkə liderinin iştirakı ilə Şuşada Türkiyənin konsulluq xidmətinin açılması üçün yaxşı fürsətdir. Konsulluq üçün böyük bina tələb olunmur. Amma hazır məkan tapmaq mümkün deyilsə, konsulluq binasının təməlatma mərasiminin keçirilməsi də mümkündür. Digər tərəfdən, Rusiya xarici işlər nazirinin müavini Mixail Qaluzin ötən ilin iyun ayında açıqlama vermişdi ki, Moskva və Bakı Rusiyanın Azərbaycanda Baş konsulluqlarının yaradılmasını müzakirə edir. Qaluzin Rusiyanın Xankəndidə konsulluq xidmətinin açılmasını nəzərdə tuturdu. Lakin təyyarə olayından sonra Xankəndidə Rusiyanın konsulluq xidmətinin açılması mümkün deyil. Bakıdakı “Rus evi”ni kəşfiyyat mərkəzinə çevirən Moskva, Xankəndidəki “konsulluq xidmətini” daha betərinə çevirər”.

Politoloq qeyd etdi ki, Azərbaycan ərazisində Rusiyaya aid belə mərkəzlərin sayının az olması milli və təhlükəsizlik baxımından faydalıdır:

“Bunun qarşılığında Türkiyə ilə ittifaq gücləndirilməli və Şuşada qardaş dövlətin konsulluq xidmətinin fəaliyyəti təmin edilməlidir. Bu, Azərbaycanın həm də Rusiya və İrandakı mərkəzlərə tutarlı cavabı olar”.

Günay

"Ərdoğanın səfəri çərçivəsində Şuşada Türkiyə konsulluğu açıla bilər" - AÇIQLAMA