Sabah Azərbaycanda bələdiyyə seçkiləri keçiriləcək. Bununla əlaqədar bu gün ölkədə “sükut günü”dür. Qeyd edək ki, sabah seçki məntəqələri səhər saat 8:00-da açılacaq və səsvermə 19:00-a qədər davam edəcək. Seçkilərdə 685 bələdiyyə üçün 16 min 96 namizəd mübarizə aparacaq. Digər tərəfdən, vətəndaşların seçkilərə marağının az olduğu istiqamətində fikirlər var.

Səbəblər nələrdir?

Bununla bağlı Sfera.az-a açıqlama verən Ağ Partiyanın sədri Tural Abbaslı deyib ki, bələdiyələrin cəmiyyətimizdə, ölkənin siyasi həyatında, idarəetməsində rolu minimaldır və buna görə bu sahəyə maraq yoxdur:

“İctimai əsaslarla dövlət qurumlarında işləmək və yaxud özünüidarə orqanlarında təmsil olunmaq heç kimin marağında deyil. Hər kəsin vaxtı o qədər çox deyil ki, həm ailəsini dolandırmaq üçün işləsin, sonra da bələdiyyədə pulsuz üzvlük etsin, bu sahədə məsuliyyət daşısın. Bu baxımdan fikrimcə, bələdiyyələrin işi təkmilləşmədikcə, təsir imkanları artmadıqca, cəmiyyətimizin nə bələdiyyələrə, nə də seçkilərinə diqqəti artacaq”.

Partiya rəhbəri qeyd etdi ki, bələdiyyələrin işini optimallaşdırmaq olar:

“Məsələn, icra hakimiyyəti və bələdiyyələrin eyni zamanda fəaliyyət göstərməsi, bələdiyyələrin təsir mexanizmlərini sıfıra endirib. Ya icra hakimiyyətlərinin səlahiyyətləri bələdiyyələrə verilməlidir, ya da bələdiyyələr bir dəfəlik ləğv olunmalıdır ki, cəmiyyət belə bir anlayışın olmadığını bilsin. Onsuz da hamı bələdiyyələrə icra hakimiyyətlərinin bir şöbəsi, yan qurumu kimi baxır. Yəni bələdiyyələrin hazırkı fəaliyyəti faydalı deyil. Ya bunun haqqında konkret qərarlar qəbul olunmalı, bələdiyyələrin səlahiyyəti artırılmalıdır, Türkiyə modeli kimi, ya da dediyim kimi bu struktur ləğv olunmalıdır”.

Türkan

"Bələdiyyələr ləğv olunmalıdır, heç kimə faydası yoxdur..." - Partiya sədrindən AÇIQLAMA