Paşinyanın Türkiyə ilə bağlı qərarı Rusiyanın regiondakı mövqeyini dəyişəcək? - AÇIQLAMA

Dünən Nikol Paşinyan panel müzakirəsi zamanı bildirib ki, Ermənistan regiondakı ölkələrlə iqtisadi əlaqələri gücləndirmək niyyətindədir və təkcə Azərbaycanla deyil, Türkiyə ilə də nəqliyyat əlaqələri qurmağa hazırdır: 

“İrəvan Türkiyə ilə diplomatik münasibətlərin qurulması üzərində işləyir”.

Maraqlıdır, Türkiyə ilə əlaqələrin yaxşılaşdırılması Ermənistanın siyasi müstəqilliyinə necə təsir edə bilər? Paşinyanın bu qərarı Rusiyanın regiondakı təsirini azalda bilərmi?

Bununla bağlı Sfera.az-a açıqlama verən politoloq İlyas Hüseynov deyib ki, Paşinyan hakimiyyətə gəldikdən sonra özünü regionda əməkdaşlığa can atan bir lider kimi təqdim etməyə çalışır:

“O yaxşı başa düşür ki, sərhədlərinin böyük hissəsi Azərbaycan və Türkiyə ilə əhatələnmiş vəziyyətdədir, düşmənçiliyi davam etdirmək, ərazi iddialarını genişləndirmək tamamilə yolverilməzdir və ölkəsini uçuruma aparır. Ermənistan ən azından “Dənizdən-dənizə böyük Ermənistan” ideologiyasını kənar qoyub, revanş xəyallarından əl çəkib, normal regional əməkdaşlıq formatına qədəm qoya bilər. O, Azərbaycan və Türkiyə faktorunu bir geosiyasi qüvvə kimi qəbul etməlidir və buna həm də borcludur. Eyni zamanda Azərbaycan və Ermənistan arasında münasibətlərin normallaşması Ermənistan və Türkiyə arasında diplomatik əlaqələrin bərpa olunmasına, kommunikasiya xətlərinin açılmasına, o cümlədən sərhədlərin blokdan çıxmasına gətirib çıxara bilər. Lakin burada ən önəmli məsələ qardaş Türkiyə üçün Azərbaycanın siyasi gündəliyidir”.

Müsahibimiz qeyd etdi ki, bu, Ankara tərəfindən dəfələrlə bəyan olunub:

“Yəni Ermənistanla Türkiyə arasında bərpa oluna bilən münasibətlər yalnız Azərbaycan və Ermənistan arasında imzalanacaq sülhdən keçir. Buna baxmayaraq Ermənistan çalışır ki, birtərəfli qaydada Türkiyə ilə əlaqələr yaratsın. Qardaş Türkiyənin mövqeyi bizə kifayət qədər aydındır. Ermənistan da bunu yaxşı bilir. Həmçinin hesab edirəm ki, Ermənistanın anti-Rusiya siyasəti yürütməsi və qərbmeyilli olması fonunda, Türkiyə ilə əməkdaşlıq rəsmi İrəvanın subyektliyini artıra bilər. Bu, çox mühüm amildir. Çünki uzun illər ərzində Rusiya ilə strateji tərəfdaşlıq, müttəfiqlik münasibətləri, 102-ci hərbi bazanın mövcudluğu, Avrasiya İqtisadi Birliyi, Kollektiv Təhlükəsizlik Müqaviləsi Təşkilatı kimi inteqrasiya qurumları və iqtisadi, hərbi siyasi bloklar İrəvanı Kremldən asılı vəziyyətə salmışdı. Bu gün Ermənistan əgər müstəqil addımlar atmağa çalışırsa, Türkiyə ilə münasibətlərə xüsusi önəm verməlidir. Yenə də burada Azərbaycanın şərtlərini yerinə yetirmək lazımdır ki, Ermənistanın müstəqilliyi daha da güclənsin, suverenliyi formalaşsın və regional proseslərdə rolu bir qədər də artsın. Bunun üçün Azərbaycanın haqlı tələblərini yerinə yetirmək önəmli xarakter daşıyır”.

Digər müsahibimiz, politoloq Məhəmməd Əsədullazadə isə bildirdi ki, Ermənistan daima Türkiyə ilə münasibətlərin normallaşdırılmasına çalışır:

“Bu istiqamətdə Türkiyə ilə dialoqda maraqlıdırlar. Amma Türkiyə tərəfi konkret olaraq Azərbaycanla ilk növbədə sülh müqaviləsi bağlandıqdan sonra bu ölkə ilə əlaqələrə gedəcəyini vurğulayır. Təbii ki, Türkiyə-Ermənistan sərhədlərinin açılması İrəvanın tamamilə Rusiyadan qopmasına və iqtisadiyyatının Türkiyə ilə paralel şəkildə inkişafına gətirib çıxara bilər. Həmçinin bu, Ermənistanın müəyyən siyasi müstəqilliyinə , Kremldən qurtulmasına səbəb ola bilər. Nikol Paşinyan bu məsələyə belə yanaşır. Digər tərəfdən, Rusiya Ermənistanın Türkiyə ilə sərhədlərinin açılmasına qarşıdır, həmişə məhz Qarabağ məsələsindən istifadə edərək Ermənistan-Türkiyə əlaqələrinin normallaşdırılmasını qəbul etməyib. Bu gün Türkiyə-Ermənistan sərhədlərində Rusiya hərbçiləri dayanıb. Yəni göründüyü kimi, Kreml proseslərin əleyhinədir”.

Günay Rəsulqızı