"Zelenski ABŞ-dən əmin deyil, ona görə də Avropanı manipulyasiya edir" - ŞƏRH

Ukrayna Prezidenti Volodimir Zelenski yanvarın 21-də Davos İqtisadi Forumunda çıxışı zamanı ABŞ və Avropanın Kiyevə gələcək dəstəyi ilə bağlı mühüm mesajlar verib. O bildirib ki, ABŞ-nin Avropa üçün əvəzsiz müttəfiq olduğu aydındır. 

“Bəs ABŞ-də kimsə Avropanın nə vaxtsa onları tərk edəcəyindən, müttəfiqi olmağı dayandıra biləcəyindən narahatdırmı? Cavab mənfidir. Prezident Tramp Avropanın fərqinə varacaqmı? O, NATO-nu zəruri hesab edirmi və Avropa İttifaqı institutlarına hörmət edəcəkmi? Avropa öz müttəfiqləri üçün ikinci və ya üçüncü olmalı deyil. Bu baş verərsə, dünya Avropasız irəliləməyə başlayacaq. Bu, bütün avropalılar üçün faydalı olmayacaq. Avropa prioritetlər, ittifaqlar və texnoloji inkişafda birincilik uğrunda rəqabət aparmalıdır. Biz daha bir dönüş nöqtəsindəyik, bəziləri bunu Avropa üçün problem kimi görür, bəziləri isə şans adlandırır. Avropa özünü güclü qlobal oyunçu, əvəzolunmaz oyunçu kimi təsdiq etməlidir”, -  Zelenski deyib.

Bununla bağlı Sfera.az-a açıqlama verən siyasi şərhçi Kənan Novruzov deyib ki, Tramp hakimiyyəti dövründə ABŞ-nin savaşla bağlı siyasətində ciddi dəyişiklik hiss edilməsi gözlənilir. Onun sözlərinə görə, böyük ehtimalla Tramp hakimiyyəti Rusiya ilə münasibətləri daha çox pisləşdirməmək naminə Ukraynaya dəstəyi azaldacaq:

“Beləliklə, Vaşinqton Moskva ilə Kiyev arasında danışıqların başlanmasına nail ola bilər. Mümkündür ki, Ukrayna ABŞ-nin dəstəyi azaldacağını indidən təxmin edir. Ona görə də Avropanın yardımı artıracağına ümid edir. Zelenskinin səsləndirdiyi fikirlər də məhz bu kontekstdən qiymətləndirilməlidir. ABŞ -nin perspektivdə Ukraynaya dəstəyi azaltması Aİ ölkələri arasında fikir ayrılığını gücləndirəcək. Bəzi dövlətlər Kiyevə dəstəyi artırmaqda israr edəcəklər. Bəziləri isə əksinə, geri çəkilmək barədə düşünə bilərlər. Bu ehtimal Zelenskini narahat edir”.

K.Novruzov qeyd etdi ki, bu baxımdan Zelenskinin səsləndirdiyi fikirlər daha çox manipulyasiya və psixoloji təsir xarakterlidir:

“”Avropa özünü güclü qlobal oyunçu, əvəzolunmaz oyunçu kimi təsdiq etməlidir”,  fikirləri birbaşa olaraq təlqin vasitəsidir. İndi Avropa ya Zelenskinin səsləndirdiyi fikirləri, həqiqətən, güclü olduğunu sübut etməli, ya da geri çəkilməlidir. Fikrimcə, Aİ vahid qərar qəbul edə bilməyəcək”.

Günay Rəsulqızı