ABŞ-nin yeni seçilmiş Prezidenti Donald Tramp dünənki andiçmə mərasimindən dərhal sonra 100-ə yaxın sərəncam imzalayacağını bildirmişdi. O, artıq Ağ Evdə ilk sərəncamlarını imzalayıb.

Sfera.az xəbər verir ki, Tramp işinə keçmiş prezident Co Baydenin sərəncamlarını ləğv etməklə başlayıb.

Sərəncamlar immiqrasiya repressiyalarına tutmuş, ABŞ-nin Paris iqlim razılaşmalarından çıxması, "TikTok"un açılması və daha bir çox məsələləri əhatə edir.

Trampın ilkin etdiklərinə və qarşıdan gələn planlarına nəzər salaq:

ABŞ Prezidenti Donald Trampın ilk sərəncamları daxili məsələlərlə bağlıdır. O bildirib ki, ölkənin təhlükəsizliyi onun xarici siyasətinin əsas istiqaməti olacaq.

Donald Tramp ABŞ-nin Ümumdünya Səhiyyə Təşkilatından (ÜST) çıxması ilə bağlı sərəncam imzalayıb. Amerika lideri, prezidentliyi dövründə təxminən 350 milyon əhalisi olan ABŞ-nin ÜST-ə verdiyi töhfələrin ildə 500 milyon dollar, əhalisi 1,4 milyarddan çox olan Çinin isə təxminən 39 milyon dollar təşkil etdiyi barədə məlumatlara istinad edib.

Eyni zamanda, Tramp növbəti dəfə ölkənin Paris İqlim Sazişindən çıxması ilə bağlı fərman imzalayıb. Tramp dəfələrlə qlobal istiləşmə anlayışının elmi əsaslılığına şübhə etdiyini bildirib. 2017-ci ildə o, ABŞ-ni Paris İqlim Sazişindən çıxarıb. 2020-ci ilin noyabrına qədər ölkə sazişdən çıxmaq prosesini başa vurmuşdu, lakin 2021-ci ilin yanvarında ABŞ-nin o zamankı Prezidenti Co Bayden Vaşinqtonu Paris Sazişinə qaytaran sərəncam imzaladı.

Donald Tramp fevralın 1-də Kanada və Meksikadan gələn bütün mallara 25% rüsum tətbiq etmək niyyətindədir. O, Avropa Birliyi ölkələrini daha çox Amerika neft və qazı almağa başlamadıqları təqdirdə ticarət tarifləri ilə hədələyib.

Tramp həmçinin milyarder loyalist İlon Maskın rəhbərlik etdiyi hökumətin səmərəliliyi agentliyinin yaradılması haqqında sərəncam imzalayıb.

ABŞ prezidenti 2021-ci ilin yanvarında Kapitoliyə basqın edən 1500 nəfəri əfv edib.

O həmçinin "TikTok"a federal qadağanı dayandırmaq üçün sərəncam imzalayıb.

Eyni zamanda o, xarici siyasətlə bağlı danışıb.

Tramp Şimali Atlantika Müqaviləsi Təşkilatına (NATO) üzv dövlətlərin müdafiə xərclərini ÜDM-in 5%-nə qədər artırmağa çalışacaq. "NATO daha çox pul ödəməlidir. NATO 5% ödəməlidir", - Tramp jurnalistlərə deyib.

Vaşinqton administrasiyasının rəhbəri ABŞ-nin Ukraynaya hərbi yardıma Şimali Atlantika Alyansının digər ölkələrinə nisbətən 200 milyard dollar çox xərcləməsindən şikayətlənib. Tramp bir daha bəyan edib ki, Ukraynada münaqişə onun rəhbərliyi altında başlamazdı və bunu bitirmək niyyətindədir.

ABŞ prezidenti Rusiya lideri Vladimir Putinlə görüşməyi planlaşdırdığını bildirib. "Mən prezident Putinlə görüşəcəyəm" deyən Tramp konkret tarix barədə məlumat verməyib. O, Rusiya lideri Vladimir Putinlə "çox tezliklə" danışa biləcəyini bildirib.

Eyni zamanda, Tramp əlavə edib ki, Volodimir Zelenski Ukraynadakı münaqişənin həlli üçün sövdələşməyə hazırdır.

Xatırladaq ki, Respublikaçı Donald Tramp yanvarın 20-də ABŞ-nin 47-ci prezidenti kimi and içib. O, 2024-cü il noyabrın 5-də keçirilən seçkilərdə Demokratlar Partiyasının namizədi Kamala Harrisə qalib gəlib.

Firuzə Əliyeva

Tramp Kapitoliyə basqın edənləri bağışladı... - Vəzifənin ilk günü imzaladığı SƏRƏNCAMLAR