"Ermənistanın Aİ-yə üzvülüyü mümkün görünmür, çünki..." - Politoloq səbəbləri SADALADI
Ötən həftə Ermənistan hökuməti ölkənin Avropa İttifaqına (Aİ) daxil olması prosesinə başlamaqla bağlı qanun layihəsini təsdiqləyib və onu parlamentin müzakirəsinə göndərib. Aİ Ermənistanın üzvlük üçün mümkün müraciətini ətraflı nəzərdən keçirəcək.
Maraqlıdır, Ermənistan Aİ-yə üzv ola biləcəkmi?
Mövzu ilə bağlı Sfera.az-a açıqlama verən siyasi ekspert Məhəmməd Əsədullazadə bildirib ki, Ermənistanın Avropa İttifaqına üzvülüyü mümkün görünmür.
Onun sözlərinə görə, Ermənistanın üzvülük üçün Aİ ilə quru sərhədi olmalıdır:
“Azərbaycanla sülh müqaviləsi bağlandıqdan sonra Türkiyə ilə əlaqələri normallaşdırmalıdır. Bundan əlavə, Türkiyə Avropa İttifaqına üzv olmalıdır ki, Ermənistan da birliyə üzv olsun. Ermənistan Türkiyə vasitəsilə Aİ ilə quru sərhədə malik ola bilər. Ermənistan çalışır ki, Türkiyə ilə normallaşma prosesini sürətləndirsin. Bu il ərzində Türkiyə və Ermənistan diplomatik əlaqələri qurula bilər. Rəsmi Ankara da bunun üçün Azərbaycanla iki ölkə arasında sülh müqaviləsinin bağlanması üçün çalışır. Türkiyə də Fransa və Rusiyanın Ermənistanda mövqeyinin güclənməməsi üçün bu ölkə ilə sərhədləri açıb, prosesləri idarə etməyi hədəfləyir”.
M.Əsədullazadə qeyd etdi ki, Türkiyə geopolitik planı olan "Qafqaz Evi" qurmaq və Qafqazda geosiyasi mövqelərini möhkəmləndirmək üçün Azərbaycan və Ermənistanla sülh müqaviləsinin bağlanmasına çalışır:
“Türkiyə Cənubi Qafqazda siyasi sabitlik və sülhü təmin edə bilərsə, Avropa İttifaqına üzv ola bilər. Çünki beynəlxalq siyasi nizam dəyişir və Avropa İttifaqının Türkiyə kimi cənub-şərq cinahı üçün bir ölkəyə ehtiyacı yaranacaq”.
Firuzə Əliyeva
