Hakan Fidanı Azərbaycana gətirən əsas SƏBƏBLƏR - ŞƏRH
Türkiyənin xarici işlər naziri Türkiyənin xarici işlər naziri Hakan Fidan Azərbaycana gəlib. O, öncə azərbaycanlı həmkarı Ceyhun Bayramovla görüşüb. Daha sonra Azərbaycan Prezidenti İlham Əliyev H.Fidanı qəbul edib.
Maraqlıdır, görüşün əsas müzakirə mövzusu nədir?
Mövzu ilə bağlı Sfera.az-a açıqlama verən siyasi ekspert Məhəmməd Əsədullazadə bildirib ki, Hakan Fidan sülh müqaviləsinin tezləşdirilməsi üçün Bakıya gəlib.
Onun sözlərinə görə, Türkiyə Azərbaycanla Ermənistan arasında sülh müqaviləsinin bağlanmasını bir neçə aya yekunlaşdırılmasını istəyir:
“Ankara Azərbaycanın ərazi bütövlüyünün təmin edilməsini, sərhədlərin delimitasiya və demarkasiya komissiyasının yaradılması və bu istiqamətdə həyata keçirilən real işləri sülh üçün təməl baza kimi qəbul edir. Həmçinin Zəngəzur dəhlizi ilə bağlı Ermənistanla danışıqlar apararaq növbəti mərhələdə açılmasına nail olunacağını vurğulayır. Rəsmi Ankara Ermənistan və Azərbaycandan sülh prosesini uzada biləcək əlavə şərtlərin irəli sürməsini qəbul etmir. Məhz Hakan Fidan sülh müqaviləsinin bağlanması və digər şərtlərin irəli sürülməməsi üçün Azərbaycanla danışıqlar aparmağa gəlib. Azərbaycan və Ermənistan arasında 17 bəndlik sülh müqaviləsinin mətni hazırlanıb. Mətnin 15 bəndi razılaşdırılıb. Yəni sülh mətninin 90% razılaşdırılıb. Ankara iki bənd razılaşdırılmaqla qısa bir vaxtda sülhün əldə edilməsini istəyir”.
Onun fikrincə, Türkiyə XİN rəhbəri Hakan Fidan Bakıdan əliboş qayıtmayacaq:
“Azərbaycan tərəfindən son günlərdə bir neçə şərtlər irəli sürülüb. Həmçinin Ermənistan da əlavə şərtlər irəli sürüb. Amma Türkiyə mövcud reallıqlara uyğun davranmağı tövsiyə edir. Yaxın perspektivdə sülh istiqamətində ciddi addımlar mümkündür. Türkiyə Ermənistanla sərhədlərini açmaq istəyir”.
Firuzə Əliyeva
