“Azərbaycan Prezidenti İlham Əliyevin yanvarın 7-də yerli televiziya kanallarına verdiyi və Ermənistana sərt xəbərdarlıq edilən, onun havadarlarından birinin qarşısında açıq tələb qoyulan müsahibənin böyük reaksiya doğuracağı öncədən bəlli idi”.

Bunu Sfera.az-a açıqlamasında deputat Sahib Alıyev deyib.

O, İranın Milli Təhlükəsizlik üzrə Ali Şurasının katibi Əli Əkbər Əhmədianın Bakıya səfərini və ardınca da İrəvana getməsini məhz həmən reaksiyalardan biri kimi qiymətləndirib.

“Əhmədianın “regionda Azərbaycan ilə İranın mədəni, tarixi, dini, o cümlədən sivilizasiya əlaqələrinin bənzərsizliyi və bu cür qədim əlaqələri olan iki ölkəni tapmağın mümkünsuzlüyü” haqqında fikirlərinin qarşılığında Prezident İlham Əliyevin “xalqlarımızın çox sıx tellərlə bir-birinə bağlılığı"ndan söz salması təbii ki, səbəbsiz deyil. Yəni biz Azərbaycan torpaqları işğal altında olanda da, 44 günlük savaş zamanı da, ondan sonrakı dövrdə də rəsmi Tehranın necə bir siyasət yeritdiyini unutmamışıq. Bununla yanaşı, İranla qarşılıqlı faydaya əsaslanan əlaqələrin genişlənməsində maraqlıyıq. İlk növbədə də ona görə ki, orada yaşayanların böyük bir hissəsini təşkil edən soydaşlarımızla çox sıx tellərlə bağlıyıq. Azərbaycanın İrandan istədiyi də qarşı tərəfin bizim kimi hərəkət etməsidir.Bunu etmədiyi halda isə rəsmi Tehran bundan kimin daha çox itirəcəyinin yaxşı fərqindədir”.

Millət vəkili bildirdi ki, təkcə İranın Milli Təhlükəsizlik üzrə Ali Şurasının katibinin deyil, Avropa Birliyinin Cənubi Qafqaz üzrə özəl təmsilçisi Maqdalena Qrononun səfərini də ölkə başçısının sözügedən müsahibəsinə operativ reaksiya saymaq olar:

“Düşünürəm ki, bu görüşlərin ardından Türkiyə Prezidenti Rəcəb Tayyib Ərdoğanın dövlət başçımıza dünənki telefon zəngi də bir növ həm müsahibəyə, həm də ona verilən reaksiyalara cavab xarakteri daşıyırdı. Hər iki prezidentin əməkdaşlığımızın bütün sahələrdə bundan sonra “Bir millət, iki dövlət” prinsipi üzrə davam etdiriləcəyini vurğulamaları o deməkdir ki, yanvarın 7-də Prezident İlham Əliyevin Zəngəzur dəhlizi ilə bağlı açıqlamasına da, Ermənistanla havadarlarına xəbərdarlığına da, İran rəhbərliyi qarşısında qoyulan tələbinə də iki dövlətin bir fikri kimi yanaşılmalıdır”.

Günay

"Əhmədianın və Qrononun səfəri Prezidentin müsahibəsinə operativ reaksiyadır" - AÇIQLAMA