"Paşinyan bunu Petrosyanın etirafına qədər bəhanələr uyduraraq rədd edirdi, ancaq indi..." - ŞƏRH

Ermənistanın ilk prezidenti Levon Ter-Petrosyanın qərbi azərbaycanlıların öz dədə-baba torpaqlarından necə qovulması ilə bağlı fikirlərinin ifadə olunduğu video yayılıb. 23 iyul 1993-cü ildə “Yerkrapa” terror təşkilatının üzvləri qarşısında çıxış edən Petrosyan bildirib ki, azərbaycanlıları qovmasa idilər, onlar Basarkeçər, Zəngibasar, Amasiya və Zəngəzurda üstünlük təşkil edəcəkdilər. 

Bununla bağlı Sfera.az-a açıqlama verən siyasi şərhçi Zeynal Əmrəliyev deyib ki, burada bir neçə məqam diqqəti cəlb edir:

“İlk növbədə keçmiş prezident etiraf edib ki, Ermənistanın Azərbaycana qarşı başlatdığı müharibədə tək hədəf Qarabağ bölgəsini ələ keçirmək olmayıb. Eyni zamanda məqsəd azərbaycanlıları öz dədə-baba torpaqlarından qovaraq Ermənistan ərazisindən türk izini silmək olub. Sovet hökumətinin bütün səylərinə baxmayaraq, SSRİ tərkibində olarkən belə Ermənistanda azərbaycanlılar çoxluq təşkil edirdi. Bunun da əsas səbəbi onların bu bölgənin yerli sakini olması idi. Həmçinin azərbaycanlılar yaşayan bölgələrdə kənd təsərrüfatının sürətli şəkildə inkişafı, yaşam standartlarının yüksək səviyyədə olması da bu bölgələrdə nüfuzun artmasına səbəb olurdu. İrəvanda oturanlar yaxşı bilirdilər ki, ölkə müstəqillik əldə etdikdən dərhal sonra Ermənistanda yaşayan ermənilər ABŞ və Avropada yaşayan qohumlarının yanına qaçacaqlar. Bunda həqiqət payı var, hazırda Ermənistan boşalır və bir dövlət kimi tamamilə öz varlığını itirməkdədir. Əgər Qərbi Azərbaycanda o cür vəhşiliklər törədilməsə və azərbaycanlılar öz torpaqlarından didərgin salınmasa idi, bu gün Ermənistan əhalisinin demək olar, böyük əksəriyyətini azərbaycanlılar təşkil edəcəkdi”.

Ekspert qeyd etdi ki, sözügüdən məsələ Levon Ter-Petrosyanın məsuliyyət məsələsini də gündəmə gətirib:

“Onun xələfləri Robert Köçəryan və Serj Sarkisyanın Azərbaycan torpaqlarının işğalında və soyqırımında günahları olduğu qədər, Petrosyan da soydaşlarımızın öz torpaqlarından deportasiya olunmasında günahkardır. Burada Petrosyanla bərabər onun hakimiyyəti dövründə vəzifədə çalışmış şəxslər, xüsusilə də "Yerkrapa" üzvləri də məsuliyyət daşıyır. Bu məsələ Ermənistanın dövlət olaraq azərbaycanlılara qarşı cinayət işlədiyini sübut edir. Rəsmi Bakı bununla bağlı beynəlxalq məhkəməyə müraciət edə bilər. Cenevrə Konvensiyasının tələblərinə əsasən, vaxtilə Qərbi Azərbaycandan qovulmuş soydaşlarımızın yenidən öz torpaqlarına qayıdışı təmin edilməlidir. Hazırda Bakı və İrəvan arasında davam edən sülh danışıqlarında Paşinyan hökuməti azərbaycanlıların öz torpaqlarına qayıdışı məsələsini müxtəlif bəhanələrlə rədd etməyə çalışır. Levon Ter-Petrosyanın etiraf videosu eyni zamanda Nikol Paşinyanı da pis vəziyyətdə qoyur. Azərbaycanlılar öz torpaqlarından qovularkən Ermənistana rəhbərlik etmiş şəxsin dilindən deyilən bu ifadələr Ermənistan dövlətinin siyasətini ifşa edir və Paşinyan tarixi ədaləti bərpa etməyə borcludur. Ermənistan tərəfi məsələ ilə bağlı hələ ki sakitliyini qoruyur”.

Günay