Ötən gün Fransa Prezidenti Emmanuel Makron səfirlər konfransında çıxışı zamanı Azərbaycanla bağlı bir sıra fikirlər səsləndirib. O qeyd edib ki, Ermənistana münasibətdə Rusiya müttəfiqlik əlaqələrinə dəyişiklik edərək, Azərbaycanın fəaliyyətini dəstəkləyib. Makron həmçinin deyib ki, Fransanın özü son aylarda bir çox dənizaşırı ərazilərində, xüsusilə də yeni Kaledoniyada Azərbaycan tərəfindən qəbuledilməz müdaxilələrlə hücumlara məruz qalıb.

Maraqlıdır, Fransa niyə Azərbaycanı hədəf alır?

Bununla bağlı Sfera.az-a açıqlama verən siyasi şərhçi Kənan Novruzov deyib ki, Yelisey Sarayı bütün imkanları ilə regiona daxil olmaq istəyir və bunun üçün bölgənin ən zəif bəndi olan Ermənistandan istifadə edilir:

“Bu isə son nəticədə Bakı-Paris münasibətlərinə təsir edir. Makronun iddiaların gəldikdə, bildirmək lazımdır ki, Azərbaycan öz xarici siyasətində heç bir dəyişiklik etməyib. Rəsmi Bakı müstəqil oyunçu kimi həm Qərblə, həm də Rusiya ilə münasibətləri qoruyur. Rusiya- Ermənistan münasibətlərinin pisləşməsi isə ikincinin “Qərbin qucağında oturması” ilə bağlıdır. Digər tərəfdən, Azərbaycan uzun müddət öz ərazi bütövlüyünün pozulmasından əziyyət çəkib. 30 il ərzində beynəlxalq ictimaiyyət bu məsələyə heç bir ciddi reaksiya göstərməyib. Azərbaycan beynəlxalq hüquqa əsaslanaraq öz işini görüb. Rəsmi Bakı həmişə olduğu kimi indi də haqsıza qarşıdır. Belə olan halda, Azərbaycanın Fransa müstəmləkəçiliyinə məruz qalanların, o cümlədən Yeni Koledoniyanın haqlı səsini dünyaya çatdırmağa çalışması təəccüblü olmamalıdır”.

K.Novruzov qeyd etdi ki, Fransa özünü beynəlxalq hüququn müdafiəçisi kimi göstərsə də, Azərbaycanla münasibətdə heç vaxt bu məqamı nəzərə almayıb:

“Bu, Parisin ikiüzlülük və riyakarlığının ən bariz nümunəsidir. Fransanın indiki gərgin məqamda Azərbaycanı öz daxili işlərinə qarışmaqda ittiham etməsi sadəcə diqqəti yayındırmaq cəhdidir. Yelisey Sarayı öz uğursuzluğunu xarici faktorlarla əlaqələndirməyə çalışır”.

Günay

Makronun Azərbaycanı ittiham etməsinin PƏRDƏARXASI