İrəvanın təxribatlara əl atmaqdakı məqsədi nədir? - AÇIQLAMA

Ötən gün Ermənistan sərhədin bir neçə istiqamətində atəşkəsi pozub. Bu isə sülh gündəliyinin müzakirə edildiyi vaxtda müəyyən suallar yaradıb.

Maraqlıdır, İrəvanın təxribatlara əl atmasında məqsəd nədir?

Bununla bağlı Sfera.az-a açıqlama verən siyasi şərhçi Asif Nərimanlı xatırladıb ki, Avropa İttifaqı missiyasının müddəti 19 fevral tarixində başa çatır.

Onun sözlərinə görə, missiyanını vaxtının uzadılmasında İrəvan da, Brüssel də maraqlıdır: “Aİ və İrəvan üçün bu missiya həm Azərbaycan qarşısında, həm də Rusiya qarşısında “qalxan”, eyni zamanda Avropa ilə əsas bağlantı rolunu oynayır. Xüsusilə bu, Donald Trampın gəlişindən sonra İrəvanın Brüsselin orbitinə daha çox yaxınlaşacağı gözləntiləri fonunda belədir. Brüssel üçün isə bu missiya Cənubi Qafqazda mövcudluğun əsas platformasına çevrilib”.

Ekspertin fikrincə, sərhəddə təxribatların törədilməsi də Aİ missiyasının zəruriliyini sübut etmək üçündür: “Sərhəddə atəşkəsin pozulması bu prosesin başlandığını göstərir. Düşünürəm ki, müşahidə missiyasının gələcəyinin Aİ-də müzakirəyə çıxarılmasına qədər bu cür təxribatlar davam edə bilər”.

Günay