Bu hər iki ölkənin maraqlarına xidmət edir
ABŞ-nin Azərbaycandakı səfiri Mark Libbi Yeni il və Dünya Azərbaycanlılarının Həmrəyliyi Günü münasibəti ilə Azərbaycan xalqını təbrikində ölkəsinin Azərbaycanla əlaqələrə böyük dəyər verdiyini deyib. Bundan başqa ABŞ-nin Azərbaycandakı səfirliyinin “X” hesabındakı ilin son paylaşımı da keçmiş paylaşımdan fərqli olaraq müsbət tonlar üzərində yazılıb.
Maraqlıdır, ABŞ bu paylaşımlarla hansı mesajı vermək istəyir?
Mövzu ilə bağlı Sfera.az-a açıqlama verən politoloq Elxan Şahinoğlu bildirib ki, bu paylaşımdan belə çıxır ki, ABŞ ilə Azərbaycan arasında 2024-cü ildəki əməkdaşlıq sadəcə təhlükəsizlik sahəsini əhatə edib:
“ABŞ Azərbaycanla təhlükəsizlik sahəsində uzunmüddətli əməkdaşlığının davam etməsinə sadiqdir” cümləsiylə başlanan paylaşımda əməkdaşlığın iki istiqaməti göstərilib. Birincisi, paylaşımda Azərbaycan Silahlı Qüvvələrinin bir neçə üzvünün ABŞ-nin yüksək hərbi institutlarını bitirməsi qeyd edilib. İkincisi, ABŞ-nin Azərbaycanın NATO-nun təhlükəsizliyini daha da gücləndirəcək çoxmillətli təlimlərdə gələcək iştirakının planlaşdırılmasını dəstəyi vurğulanıb.
Halbuki, keçmiş illərdə əməkdaşlığın ən azı 4 istiqaməti mövcud idi. Bunu amerikalı rəsmilər və diplomatlar dönə-dönə vurğulayırdılar. Bu təhlükəsizliklə yanaşı, enerji, iqtisadiyyat və insan haqları mövzuları idi. Rəsmi Bakı Donald Trampın prezidentliyi dönəmində münasibətlərin müsbətə doğru dəyişəcəyinə ümidlidir. ABŞ ilə Azərbaycan arasında tərəfdaşlıq münasibətləri hər iki ölkənin maraqlarına xidmət edir".
Firuzə Əliyeva
