Qroznı hava limanı sərnişinlər üçün BAĞLANDI - “Xalça” planı tətbiq edildi
Dekabrın 27-də Qroznı şəhərinin “Severnı” Beynəlxalq Hava Limanında “Xalça” planı tətbiq edilib.
Sfera.az xəbər verir ki, bu barədə hava limanının baş direktoru Alvi Şahgiriyev “İnterfaks”a bildirib. Plan Moskva vaxtı ilə saat 5:08-də elan edilib.
"Hava limanı “Xalça” planına uyğun olaraq bağlıdır. Biz sərnişinləri qəbul etmirik və ya buraxmırıq", - baş direktor qeyd edib.
Rusiyanın Federal Hava Nəqliyyatı Agentliyinin nümayəndəsi Artem Korenyako isə bildirib ki, uçuşların məhdudlaşdırılması daha bir neçə hava limanında tətbiq olunur. Həmin məhdudiyyətlərin bəziləri artıq ləğv olunub. Belə ki, Kazan hava limanında saat 10:00-dan etibarən təyyarələrin gəlişi və buraxılması ilə bağlı məhdudiyyətlər aradan qaldırılıb, hava limanı normal rejimdə işləməyə davam edəcək.
Xatırladaq ki, mülki təyyarələrin uçuşlarının təhlükəsizliyini təmin etmək məqsədilə bir neçə hava limanında müvəqqəti məhdudiyyətlər tətbiq olunub. Dekabrın 26-da Moskvada “Şeremetyevo”, “Domodedovo”, “Vnukovo” və “Jukovski” hava limanlarında “Xalça” planı tətbiq edilib. Həmin gün Moskva vaxtı ilə saat 16:39-da bütün hava limanları normal fəaliyyətini bərpa edib.
Vasif
Sfera.az
