"Fərziyyələr qurmaq düzgün deyil" - Kremldən qəzaya REAKSİYA
Kremldən təyyarə qəzası ilə bağlı məsələyə reaksiya gəlib.
Sfera.az bildirir ki, bu barədə Rusiya Prezidentinin mətbuat katibi Dmitri Peskov açıqlama verib.
“Hazırda, istintaqın getdiyi bir vaxtda Aktau yaxınlığında təyyarə qəzasının səbəbləri ilə bağlı fərziyyələr qurmaq düzgün deyil. Bunu heç kim etməməlidir, Kreml də etməyəcək”, - Dmitri Peskov deyib.
O qeyd edib ki, indi hər hansı bir aviasiya hadisəsi xüsusi aviasiya orqanları tərəfindən araşdırılmalıdır.
Peskov xatırladıb ki, bir gün əvvəl MDB-nin qeyri-rəsmi sammiti zamanı Rusiya Prezidenti Vladimir Putin həlak olanların ailələrinə və yaxınlarına dərin hüznlə başsağlığı verib, xəsarət alanların tezliklə sağalmasını arzulayıb.
Xatırladaq ki, çərşənbə günü səhər saatlarında Qazaxıstanın Aktau şəhəri yaxınlığında Bakı-Qroznı reysi ilə uçan Azərbaycan Hava Yollarına məxsus təyyarə qəzaya uğrayıb. Təyyarənin göyərtəsində 62 sərnişin və 5 ekipaj üzvü olmaqla 67 nəfər olub. Sərnişinlər arasında 37 Azərbaycan vətəndaşı olub, onlardan 23-ü ölüb, 14-ü sağ qalıb. Hər üç Qırğızıstan vətəndaşı sağ qalıb. 16 Rusiya vətəndaşı olub, onlardan yeddisi ölüb, doqquzu sağ qalıb. Altı Qazaxıstan vətəndaşının hamısı həlak olub.
Günay
