"Ermənistanın silahlandırılması regionda yeni eskalasiyaya gətirib çıxara bilər" - ŞƏRH

“Makron hökumətinin Ermənistana tədarük etdiyi silahlar hücum silahlarıdır, öldürücüdür və Azərbaycan üçün praktiki təhlükə yaradır”.

Bunu Prezident İlham Əliyev “Rossiya Seqodnya" Beynəlxalq İnformasiya Agentliyinin Baş direktoru Dmitri Kiselyova müsahibəsində bildirib.

“Biz dəfələrlə Ermənistana və onun ABŞ Dövlət Departamentindəki himayədarlarına çatdırmışıq ki, buna son qoyulmalıdır. Amma təəssüf ki, bizim səsimiz eşidilmir, Ermənistanın silahlanması prosesi sıçrayışla gedir”, -  Prezident əlavə edib.

Bununla bağlı Sfera.az-a açıqlama verən politoloq Məhəmməd Əsədullazadə deyib ki, Ermənistanın silahlandırılması regionda yeni eskalasiyaya gətirib çıxara bilər:

“Göründüyü kimi rəsmi İrəvan sülhdən imtina edir. İlk növbədə qeyd etmək lazımdır ki, onlar “Müstəqillik” bəyannaməsindən Azərbaycana qarşı ərazi iddialarını çıxarmırlar. İkincisi,  Avropa İttifaqının yarım hərbi mülki missiyasını sərhəddən geri çəkmirlər. Halbuki, Kazanda bununla bağlı razılıq əldə olunmuşdu. Nəticədə isə Ermənistan sürətlə silahlanır və masada qalan bəndləri yerinə yetirmir. Buna baxmayaraq sülhdən danışır”.

Ekspert qeyd etdi ki, Fransa xüsusilə İrəvanı sülhdən yayındırır:

“Ermənistan silahlanaraq əlavə şərtlər irəli sürərsə, Azərbaycan tərəfi preventiv addımlar ata bilər. Proseslərə Türkiyənin qoşulması da mümkündür. Növbəti eskalasiya zamanı Ermənistan ərazi itkilərinə məruz qala bilər. Artıq Ermənistan Baş nazirinin müavini Mher Qriqoryan da Zəngəzur dəhlizinin açılmayacagını vurğuladı. Bu baxımdan Fransa və Türkiyənin maraqları Cənubi Qafqazda toqquşa bilər”.

Günay Rəsulqızı