“Ukraynada gərginliyin artmasına səbəb Qərbin Türkiyənin səylərinə kifayət qədər dəstək verməməsidir”.

Bunu Türkiyənin hakim Ədalət və İnkişaf Partiyasının sözçüsü (AK Partiya) Ömər Çelik deyib. O bildirib ki, Ukraynada artıq hipersonik raketlərdən istifadə edilir. “Qərb dövlətləri Türkiyə Prezidenti Rəcəb Tayyib Ərdoğanın Ukrayna ilə Rusiya arasında müharibənin başa çatması üçün ortaya qoyduğu diplomatik səyləri kifayət qədər dəstəkləmir. Əgər güclü dəstək verilsə idi, bu gün getdikcə qloballaşan müharibə gündəmini yox, başqa gündəmləri müzakirə edərdik”, - Çelik əlavə edib.

Bununla bağlı Sfera.az-a açıqlama verən siyasi şərhçi Kənan Novruzov deyib ki, rəsmi Ankara Şərqi Avropada sabitliyin təmin olunmasında, həqiqətən, maraqlıdır:

“Ankaranın həm Moskva, həm də Kiyevlə normal münasibətləri var. Ona görə də perspektivdə seçim qarşısında qalmaq istəmir. Eyni zamanda müharibənin davam etməsi perspektivdə Türkiyə - NATO, Türkiyə- ABŞ münasibətlərinə təsir edə bilər. Ankara bunu da istəmir. Türkiyə həmçinin Qərbin və NATO-nun müharibə vasitəsilə Şərqi Avropada güclənməsində də maraqlı deyil. Məhz bu səbəblərdən Türkiyə bütün imkanları ilə tərəfləri bir araya gətirməyə çalışır. Əslində Türkiyənin vasitəçiliyi ilə tərəflər arasında bir neçə dəfə razılıq əldə olunub. Ankaranın sayəsində vaxtı ilə sülhə bir addım qalmışdı. Bu gün isə sülhün bərpa olunması və danışıqların başlanması daha çətindir. Bunun üçün Türkiyə həm də ABŞ və Qərb dövlətləri ilə danışıqlar aparmalıdır. Təkcə Kiyev və Moskva ilə təmaslar kifayət deyil”.

Şərhçi qeyd etdi ki, Qərbin və Ankaranın Ukrayna ilə bağlı mövqeləri müxtəlifdir:

“ABŞ və Avropanın əksər dövlətləri Türkiyədən fərqli olaraq Ukraynadakı müharibənin genişlənməsində maraqlıdır. ABŞ-dəki prezident seçkilərində Respublikaçı Donald Trampın qalib gəlməsi, sözsüz ki, Ukraynadakı müharibəyə təsir edəcək. Onun Ukraynadakı müharibəyə son qoyması mümkündür. Güman ki, bu, Ukraynaya dəstəyin azaldılması nəticəsində bu dövlətin danışıqlar masasına otuzdurulması ilə baş verəcək. Andiçmə mərasimindən sonra Tramp hakimiyyəti ilə Türkiyə Ukraynadakı vəziyyətin nizamlanması üzrə danışıqlara və birgə işə başlaya bilər. Ehtimal etmək olar ki, Ankara ilə Tramp hakimiyyətinin koordinasiyalı səyləri nəticəsində müharibə 2025-ci ildə başa çatacaq”.

Günay Rəsulqızı

"Rusiya-Ukrayna müharibəsini Tramp bu ölkə ilə birgə bitirəcək" - AÇIQLAMA