Amerikalı tanınmış jurnalist Taker Karlson Moskvada Rusiyanın xarici işlər naziri Sergey Lavrovdan müsahibə alıb. Karlson digər məsələlərlə yanaşı, Rusiya nazirinə ABŞ və Ukrayna ilə münasibətlər barədə sual verib.

Sfera.az müsahibədən əsas məqamları təqdim edir.

Xarici işlər naziri Sergey Lavrov amerikalı jurnalist Taker Karlsona müsahibəsində deyib ki, Rusiya Ukrayna böhranının həllinin yalnız Moskva və Vaşinqtonun əlində olduğuna inanmır.

O qeyd edib ki, Ukraynadakı münaqişənin sülh yolu ilə həlli o halda mümkündür ki, Kiyev NATO-ya daxil olmaq planlarından əl çəksin, ölkədəki Qərb hərbi bazalarını bağlasın və xarici qoşunların iştirak etdiyi təlimləri ləğv etsin:

“Moskva Ukrayna ətrafında hadisələrin istənilən inkişafına hazırdır, lakin Rusiyanın təhlükəsizlik maraqlarını nəzərə alaraq sülh yolu ilə nizamlanmaya üstünlük verir. Əgər Ukrayna sülh istəyirsə, NATO istəklərindən əl çəkməli, Qərb hərbi bazalarını bağlamalı və xarici qoşunlarla təlimləri ləğv etməlidir. Onun sözlərinə görə, 2022-ci ildə Zelenski Qərbə şərtlər diktə edəcəyinə əmin idi, ona görə də Rusiya ilə danışıqları qadağan edən fərman imzalamışdı. Rusiya Federasiyası Zelenski rejimindən fərqli olaraq heç vaxt Ukraynada insanları öldürmək niyyətində olmayıb. Ukrayna münaqişəsi BMT Nizamnaməsi əsasında, lakin bütövlükdə həll edilməlidir”.

XİN başçısı "Oreşnik" raketinin istifadəsi haqqında da suallara cavab verib:

“Qərb Rusiyanın “qırmızı xətləri”nin çevik olduğuna inanaraq böyük səhvə yol verir. Rusiya ABŞ ilə nüvə müharibəsi istəmir və bunun qarşısını almaq üçün hər şeyi edir. “Oreşnik” raket zərbəsi göstərdi ki, Rusiya Qərbin ölkəyə “strateji məğlubiyyət” vermək məqsədinə çatmasının qarşısını almaq üçün istənilən vasitədən istifadə etməyə hazırdır. Qərb “Oreşnik” raketindən istifadə etdikdən sonra lazımi nəticə çıxarmasa, Rusiya əlavə mesajlar göndərməyə hazırdır”.

Lavrov aydınlaşdırıb ki, Rusiya Donald Trampın administrasiyasını konkret addımlarla mühakimə edəcək, lakin ABŞ prezidenti postunu tərk edən Co Bayden Trampa ağır miras qoymaq istəyir:

“Rusiya ABŞ ilə normal münasibətlər istəyir və iki ölkənin əməkdaşlıq edə bilməməsi üçün heç bir səbəb görmür. Moskva ilə Vaşinqton arasında bir neçə qapalı kanal var, əsasən də məhbus mübadiləsi məsələlərində. Rusiya Tramp administrasiyasını konkret addımlarla mühakimə edəcək, lakin vəzifəsini tərk edən prezident Co Bayden ağır miras buraxmaq istəyir. Bu, prezident Barak Obamanın Trampla etdiklərinə bənzəyir. Tramp güclü və mehriban siyasətçidir, lakin o, rusiyapərəst deyil. Rusiyanın ABŞ-nin seçilmiş prezidenti ilə təmaslarında top Trampın meydanındadır”.

Baş diplomat qeyd edib ki, Suriyada vəziyyəti sabitləşdirmək asan deyil, çoxlu aktyorların iştirak etdiyi mürəkkəb oyundur. Rusiya tərəfdaşları ilə Suriyada terrorçuların maliyyələşdirilməsi və silahlandırılması kanallarının kəsilməsi məsələsini müzakirə edəcək.

Xatırladaq ki, T.Karlson cari ilin fevralında Rusiya Prezidenti Vladimir Putindən müsahibə almışdı. 2 saat 6 dəqiqə davam edən müsahibə zamanı Rusiya lideri təqribən 60 suala cavab vermişdi.

Firuzə Əliyeva

""Oreşnik"dən nəticə çıxarmasalar, Rusiya əlavə..." - Lavrovun Qərbə ötürdüyü MESAJLAR