Çin Xarici İşlər Nazirliyi bəyan edib ki, Pekin Tayvana silah satışı ilə bağlı ABŞ-nin 13 müdafiə şirkəti və 6 idarəçisinə sanksiya tətbiq edib.

Sfera.az-ın məlumatına görə, “Qara siyahı”ya düşən fiziki və hüquqi şəxslərin aktivləri dondurulacaq, onlarla biznes fəaliyyəti qadağan ediləcək. Məhdudiyyətlər dekabrın 5-dən qüvvəyə minəcək.

"ABŞ bu yaxınlarda Çinin Tayvan bölgəsinə növbəti silah satışını təsdiqləyib ki, bu da bir Çin prinsipini və üç birgə Çin-ABŞ "kommunike"sinin müddəalarını açıq şəkildə pozur", - Xarici İşlər Nazirliyi bəyan edib.

Bildirilir ki, ABŞ bu cür hərəkətlərlə Çinin daxili işlərinə qarışır və ölkənin suverenliyinə və ərazi bütövlüyünə zərbə vurur. Qara siyahıya salınan adlar arasında şirkətlərdən “Teledyne Brown Engineering”, “BRINC Drones”, “Rapid Flight”, “Red Six Solutions”, “Shield AI”, “SYNEXXUS”, “Firestorm Labs”, “Kratos” Pilotsuz Hava Sistemləri, “HavocAI”, “Neros Technologies”, “Cyberlux Corporation”, “Domo Tactical Communications”, “Group W” və “Raytheon” törəmə şirkətinin yüksək vəzifəli şəxsləri, “BAE Systems Land and Armament” şirkətinin baş direktoru Charles Woodburn, “United Technologies” bölməsinin baş icraçı direktoru Richard Crawford, “Data Link Solutions” şirkətinin prezidenti Beth Edler, və “BRINC Drones” şirkətinin baş direktoru Blake Resnick var.

Qeyd edək ki, oktyabr ayında ABŞ Müdafiə Nazirliyi Tayvan üçün Milli Qabaqcıl Yerdən Havaya Raket Sistemi (NASAMS) və radar sistemləri də daxil olmaqla, təxminən 2 milyard dollar dəyərində silah paketinə icazə verib.Çin Prezidenti Si Cinpin noyabrın 17-də Peruda amerikalı həmkarı Co Baydenlə görüşündə qeyd edib ki, əgər Vaşinqton Tayvan boğazında sülhü qorumağa çalışırsa, məsələyə ehtiyatlı yanaşmalı, Taypeyin müstəqilliyinə açıq şəkildə qarşı çıxmalı və Çinin sülh yolu ilə birləşməsini dəstəkləməlidir. Tayvan 1949-cu ildə Çan Kay-şek (1887-1975) başda olmaqla qalan Kuomintang qüvvələri Çindəki vətəndaş müharibəsində məğlub olduqdan sonra yerli administrasiyası tərəfindən idarə olunur. Bununla belə, Pekin adanı özünün əyalətlərindən biri hesab edir və bu mövqe əksər ölkələrin, o cümlədən Rusiya tərəfindən paylaşılır. Vaşinqton 1979-cu ildə Tayvanla diplomatik əlaqələri kəsərək Çinlə əlaqələr qurub. ABŞ Vahid Çin siyasətini tanımaqla yanaşı, Taypey administrasiyası ilə əlaqə saxlamağa və adayı silahla təmin etməyə davam edir. Çinin hesablamalarına görə, ABŞ son illərdə Tayvana 70 milyard dollardan çox hərbi yardım edib.

Firuzə Əliyeva

Çin ABŞ-nin 13 silah istehsalçısına sanksiya TƏTBİQ ETDİ