Fransada vəziyyət GƏRGİNLƏŞİR - Baş nazir istefaya göndərildi

Fransa parlamenti Mişel Barnye hökumətinə etimadsızlıq səsverməsini dəstəkləyib. O, müasir Fransa tarixində ən qısa müddətə baş nazir vəzifəsini icra etdikdən sonra vəzifəsini tərk edəcək.

Sfera.az xəbər verir ki, dünən parlamentdə müxalifət birləşərək etimadsızlıq səsverməsində ortaq hərəkət etmək qərarına gəlib. Parlamentin hökumətə etimadsızlıq göstərməsindən sonra hökumət fəaliyyətini dayandırmalıdır.

Belə bir hadisə Fransanın siyasi tarixində 1962-ci ildən bəri baş verməmişdi. Fransa hökumətinin dağılması prezident Emmanuel Makron üçün də arzuedilən deyil. Siyasi xaos fonunda prezidentin öz vəzifəsini tam şəkildə icra etməsi ehtimalı azdır. Makronun səlahiyyət müddəti 2027-ci ildə başa çatacaq.

Bəzi avropalı şərhçilər hesab edir ki, gərginliyi azaltmaq üçün Makronun istefaya getməsi də mümkündür. Onların fikrincə, bu baş verərsə, müasir Fransada görünməmiş bir hadisə yaşanacaq. Əksər siyasi şərhçilər düşünür ki, siyasi mühiti sakitləşdirmək üçün növbədənkənar seçkilərin keçirilməsi vacibdir.

Xatırladaq ki, Fransada gərginlik parlamentin hökumətin hazırladığı büdcə layihəsini qəbul etməməsi ilə əlaqədar yaranıb. Hökumət büdcə kəsirini azaltmaq üçün vergilərin artırılmasını təklif edir. Müxalifət isə buna qarşıdır.

Vasif

Sfera.az