"Fransada daxili siyasi vəziyyət gərgindir, Makron tezliklə postunu itirə bilər" - ŞƏRH
“Fransada daxili siyasi vəziyyət kifayət qədər gərgindir”.
Bunu Sfera.az-a açıqlamasında siyasi şərhçi Kənan Novruzov deyib.
O xatırladıb ki, bundan əvvəl müxalifət lideri hökumətin yaxın günlərdə istefa verə biləcəyini söyləmişdi:
“Ümumiyyətlə, Prezident Emmanuel Makrondan və Baş nazir Mişel Barnyedən narazılıq getdikcə artır. Bunun əsas səbəbi daxili və xarici siyasətdəki uğursuzluqdur. Özünün xarici siyasətində imperialist maraqları əsas götürən, bu məqsədlə fərqli bölgələrdə hərbi toqquşmalara rəvac verən rəsmi Paris kolonialist siyasətini, demək olar, daxildə də davam etdirir. Ölkə daxilində əhalinin rifahı nəzərə alınmır. Müntəzəm olaraq keçirilən aksiyalar, polis-vətəndaş toqquşmaları da məhz bunun nəticəsidir. Əhali nəinki hökumətin, həm də hakimiyyətin dəyişməsini tələb edir”.
Müsahibimizin sözlərinə görə, Makronun fərqli hökumətlərlə işlədiyini nəzərə almaq lazımdır:
“Gələn ildən etibarən Fransa iqtidarının işi daha da çətinləşəcək. Belə ki, ABŞ-də Donald Trampın timsalında hakimiyyətə gələn Respublikaçılar, yəqin ki, Rusiya ilə münasibətləri loyallaşdırmağa çalışacaq. Bu, Avropanın Rusiya qarşısında tək qoyulması deməkdir. Beləliklə, Avropa dövlətləri arasında gərginlik artacaq. Bu isə Fransa siyasətində də hiss ediləcək. Fransa ya Ukraynaya dəstəyi daha da artırmalı olacaq, ya da dayandıracaq. Hər iki halda hakimiyyətdən narazılığın artması mümkündür”.
Siyasi şərhçi bildirdi ki, Fransada növbəti prezident seçkilərinin 2027- ci ildə keçiriləcəyi gözlənilir:
“2017-ci ildən hakimiyyətdə olan Makron ən yaxşı halda üç il sonra iqtidardan uzaqlaşdırılacaq. Hərçənd hazırkı tendensiya o zamana kimi növbədənkənar prezident seçkilərinin keçirilməsinə əsas yaradır. Mövcud hökumət isə yaxın zamanda istefaya göndərilə bilər”.
Günay Rəsulqızı
