Fransada hökumət dəyişə bilər - 2 dekabradək vaxt verildi
Fransanın mövcud hökumətinin buraxılması ehtimalı artır. Aparılan rəy sorğuları və parlamentdəki gərginlik hazırkı Baş nazir Mişel Barnierin vəzifəsini itirməsinə səbəb ola bilər.
Sfera.az xarici mediaya istinadən xəbər verir ki, Fransada xalqın 53 faizinin dəstəyi ilə fəaliyyətə başlayan Baş nazir Mişel Barnier son sorğuya görə xalqın 36 faizininin dəstəyini qazana bilir. Xalqın 53 faizi hazırkı hakimiyyətin dəyişməsini istəyir.
Digər tərəfdən, ifrat sağçı lider Marin Le Pen hökumətə təzyiqlərini davam etdirir. İfrat sağçı Milli Rallinin (RN) Parlament Qrupunun sədr müavini Marin Le Pen büdcə ilə bağlı tələblərini "qırmızı xətt" olaraq xarakterizə edib və Barnier hökumətini etimadsızlıq təklifini dəstəkləməklə hədələyib.
Le Pen “Le Monde” qəzetinə açıqlamasında elektrik enerjisi qiymətlərindəki vergi artımının geri götürülməsinə baxmayaraq, 2025-ci il büdcəsinin hazırkı variantında hələ də problemlərin olduğunu vurğulayıb. Le Pen büdcə ilə bağlı tələblərini yerinə yetirmək üçün Barnierə dekabrın 2-dək vaxt verdiyini açıqlayıb.
Parlamentdə 124 deputatı olan ifrat sağçı RN və 192 üzvü olan solçu Yeni Xalq Cəbhəsi (NFP) ittifaqı hökumətə qarşı etimadsızlıq təklifini birgə dəstəkləyir.
Parlamentdə etimadsızlıq təklifi rəsmiləşərsə, hökumət istefaya getməli olacaq.
Vasif
