Xəbər verdiyimiz kimi, Ermənistan Kollektiv Təhlükəsizlik Müqaviləsi(KTMT) Təşkilatının növbəti sammitinə də qatılmayıb.

İrəvanın bu addımı necə dəyərləndirilməlidir? Bu konteksdə, KTMT-nin parçalandığını demək olarmı?

Bununla bağlı Sfera.az-a açıqlama verən siyasi ekspert Məhəmməd Əsədullazadə qeyd edib ki, KTMT 30 il ərzində nəinki beynəlxalq müstəvidə, heç regional təşkilat kimi özünü doğrultmayıb. Müsahibimizin sözlərinə görə, səbəb Rusiyanın üzv ölkələri Moskvaya tabe etdirmək siyasəti aparmasıdır:

“Bu baxımdan, üzv ölkələr təşkilatın inkişafında maraqlı olmadılar. Fikrimcə, yeni dünya siyasi nizamında KTMT-yə ehtiyac olmayacaq. Təşkilat Rusiya-Belarus və Tacikistanı əhatə edən bir qurum səviyyəsindədir. Bu iki üzv Ukrayna savaşında neytrallıq nümayiş etdirir. Ermənistana gəldikdə isə, KTMT-də de-fakto fəaliyyətini dayandırıb. Gələn ildən isə de-yure bu təşkilatı tərk edə bilər. Rusiya rəhbərliyi təşkilatın müasir siyasi və hərbi çağırışlara cavab vermədiyinin fərqindədir. Qazaxıstan və Qırğızıstan isə daha çox Türk Birliyi çərçivəsində hərbi təşkilatda maraqlıdır. Onlar Ankara ilə təhlükəsizlik sahəsində əməkdaşlığı inkişaf etdirirlər”.

Ekspert bildirdi ki, Rusiya nüvə doktrinasında dəyişikliklər edərək nüvə çətirinin müttəfiq ölkələrə də şamil edildiyini vurğulayıb:

“Təbii ki, bununla KTMT-nin nüvə çətiri olduğunu Qərbə mesaj kimi ötürməyə çalışır. Amma bu, təşkilata müsbət təsir etməyəcək. Lakin Moskva savaşda qalib gələrsə, KTMT-yə yeni üzvlər cəlb etməklə NATO-nun alternativini yarada bilər. Hazırda isə təşkilat zəifləyib və parçalanır”.

Günay Rəsulqızı

"Ermənistan sammitlərdə iştirak etmir,Qazaxıstan və Qırğızıstan isə..." - KTMT parçalanır?