""Hizbullah" və İsrail arasında atəşkəsin dayanıqlılığı bundan asılı olacaq" - ŞƏRH

ABŞ və Fransanın vasitəçiliyi ilə İsraillə “Hizbullah” arasında atəşkəs əldə edilib. Əsasən, Fransa Livanda humanitar böhranın qarşısını almaq üçün ABŞ ilə danışıqlar aparaq atəşkəsə nail olub. 

Bununla bağlı Sfera.az-a açıqlama verən siyasi ekspert Məhəmməd Əsədullazadə deyib ki, Fransa Livanda siyasi -humanitar böhranın inkişafında maraqlı deyil:

“Livanın əsas maliyyə dəstəkçisi Fransadır. Uzun illər Livan Fransanın müstəmləkəsi olub. “Hizbullah” İsrailin Livanda quru əməliyyatının qarşısını ala bilib. Yalnız qırıcı təyyarələr sayəsində “Hizbullah” zərbələr endirməklə, daha çox Livanın infrastrukturunu sıradan çıxarırdı. Fikrimcə,“Hizbullah” və İsrail arasında atəşkəsin dayanıqlığı Qəzza ilə  bağlı proseslərdən asılı olacaq. Artıq ABŞ Türkiyə ilə birgə HƏMAS-la İsrail arasında atəşkəsin əldə edilməsi barədə danışıqlara başlayacaq”.

M.Əsədullazadə bildirdi ki, Türkiyə Yaxın Şərqdə geosiyasi proseslərin həllində fəal rol oynayacaq:

“ABŞ İranı HƏMAS-dan uzaqlaşdırmaq üçün məhz Türkiyə ilə birgə çalışacaq. Amma İran Türkiyənin rolunu sabotaj edə bilər. Vaşinqton Ankara ilə çalışacaqsa, atəşkəs əldə edilə bilər. Həmçinin Fələstin dövlətinin yaradılması istiqamətində Türkiyənin ABŞ ilə danışıqlar aparması mümkündür. Digər tərəfdən, Trampın Ağ Evə gəlməsi gedişatı “tormozlaya bilər”.  Bayden isə yanvarın 20- kimi Yaxın Şərqdə atəşkəsə nail olmağa çalışır. Amma bu, yarımçıq atəşkəs olacaq”.

Günay