İqlim dəyişikliyi qlobal hidroloji dövranın əsas parametrlərini dəyişərək dünyada su ilə bağlı problemləri daha da kəskinləşdirir.

Sfera.az xəbər verir ki, bunu COP29-un prezidenti, ekologiya və təbii sərvətlər naziri Muxtar Babayev COP29 çərçivəsində keçirilən “İqlim, təbiət və insanlar üçün suyun həyat xəttini qeyd edirik” adlı tədbirdə deyib.

“Su iqlim dəyişikliyinin mərkəzində dayanır və onun təsirləri əsasən su dövranındakı pozulmalar vasitəsilə hiss olunur. Azərbaycanda bu təsirlər Xəzər dənizinin səviyyəsinin azalması və biomüxtəlifliyin tənəzzülü kimi ciddi problemlərlə özünü göstərir. Bu, yalnız ölkəmizdə deyil, bütün dünyada daxili su hövzələrində müşahidə olunan təhlükəli bir tendensiyadır”, - deyə M.Babayev bildirib.

O, əlavə edib ki, su yalnız iqlim dəyişikliyinin qurbanı deyil, eyni zamanda onun həll yolunun ayrılmaz hissəsidir.

“Su, yoxsulluğun azaldılması, qida təhlükəsizliyi, gender bərabərliyi və biomüxtəlifliyin qorunması kimi Dayanıqlı İnkişaf Məqsədlərinə çatmaqda mühüm rol oynayır. Lakin tarixi olaraq, su qlobal iqlim müzakirələrinin diqqətindən kənarda qalmışdır. COP29 Prezidentliyi bu məsələyə diqqəti artırmaq üçün suyu iqlim fəaliyyətinin əsas prioritetlərindən biri kimi müəyyən edib”, - deyə o qeyd edib.

M. Babayev çıxışında COP29 çərçivəsində başlanan “Bakı Su Dialoqu” təşəbbüsünün əhəmiyyətini vurğulayıb.

“Bu təşəbbüs su ilə bağlı qlobal əməkdaşlıq üçün yeni bir platformadır. Məqsəd, iqlim dəyişikliyi, biomüxtəlifliyin azalması, çirklənmə və səhralaşma kimi qlobal problemlərin həlli yollarını bir araya gətirməkdir. "Bakı Su Dialoqu" COP-lar arasında su məsələləri üzrə davamlılığı təmin edəcək və su ilə bağlı fəaliyyətləri beynəlxalq və regional səviyyələrdə genişləndirməyi hədəfləyir”, - deyə nazir bildirib.

O, həmçinin vurğulayıb ki, COP29 Su üzrə İqlim Fəaliyyəti Bəyannaməsi elmi əsasları gücləndirəcək, yeni tərəfdaşlıqlar yaradacaq və su ilə bağlı qlobal siyasət tədbirlərinə dəstək verəcək.

COP29 Prezidentliyi bütün tərəfdaşları su bəyannaməsinə qoşulmağa dəvət edib.

“Bakı Su Dialoqu"nun məqsədlərinə nail olmaq üçün birlikdə çalışmalıyıq. Bu təşəbbüs, iqlim dəyişikliyi ilə mübarizədə suyun qlobal siyasətə daha dərin inteqrasiyasını təmin edərək uzunmüddətli dayanıqlı həllər üçün mühüm rol oynayacaq”, - deyə COP29-un prezidenti bildirib.(report)