ABŞ Prezidenti Co Bayden ATACMS və digər uzaq mənzilli raketlərlə Rusiyanın dərinliklərinə zərbə endirməyə icazə verib. 

Bununla bağlı Sfera.az-a açıqlama verən politoloq Məhəmməd Əsədullazadə deyib ki, Rusiyanın Şimali Koreya ilə hərbi ittifaqı və cəbhədə taktiki irəliləməsi Vaşinqtonun bu qərarı qəbul etməsini labüd edib. Onun sözlərinə görə, bu həm də Trampın yanvarın 20-dən vəzifə səlahiyyətlərinə başlamasından sonra proseslərin Vaşinqtonun əleyhinə dəyişəcəyinin qarşısını almaq üçün verilən qərardır:

“Hazırda Rusiya cəbhə xəttində irəliləyiş əldə edir. Bu da bir neçə aya Ukraynanın məğlubiyyətinə gətirib çıxara bilər. Tramp isə Kiyevin məğlubiyyətinə görə, atəşkəsin əldə edilməsinə çalışa və tam yardımları kəsə bilərdi.  Bir neçə gün bundan əvvəl, Almaniya kansleri Olaf Şolts Putinə zəng edərək ona danışıqlar masasına oturmağı təklif etmişdi. Əks təqdirdə, Almaniyanın Ukraynaya yeni silahlar verəcəyini qeyd etmişdi. Kansler Rusiyanın danışıqlar prosesindən yayınması müqabilində Ukraynaya hərtərəfli dəstək olunmasını diqqətinə çatdırıb. Putin Şotlsla telefonla danışdıqdan sonra Ukraynaya raket və PUA zərbələr endirdi. Bununla da, Rusiyanın geri çəkilməyəcəyi mesajını vermiş oldu. Artıq  ABŞ, Böyük Britaniya, Fransa və Almaniya konsensus əldə edərək, Ukraynaya yenidən hərbi yardımları intensivləşdirib və verilən silahlardan Rusiyanın dərinliklərinə zərbəyə icazə veriblər. Rusiya qərardan narahatdır və Ukraynanın infrastrukturunu hədəf alacağını bəyan edib”.

Ekspert qeyd etdi ki, ABŞ və Avropa Rusiyanın Ukraynada qələbə əldə etməsinə imkan verə bilməz:

“Rusiya və Ukrayna arasında müharibənin yeni mərhələsi başlayacaq. Böyük Britaniya, Fransa və Polşa, Rumıniyanın Ukraynaya ordu göndərməsi istisna deyil. Yeni silahların verilməsi və Rusiyanın dərinliklərinə zərbələr endirilməsi isə Rusiyanın hücumunu durduracaq. Fransa Prezidenti Makron Putinin sülh istəmədiyini və müharibədə maraqlı olduğunu vurğulayıb. Göründüyü kimi, Qərb Rusiyanın məğlubiyyətinə gətirəcək addımlara başlayıb. Məhz Avropa ölkələri Trampın Ağ Evə gəlməsinə kimi həlledici və əhəmiyyətli irəliləyişə nail olmağa çalışacaq. Növbəti iki ay ərzində ABŞ və Avropa Rusiyanı danışıqlar masasına oturtmaq və qoşunlarının Ukraynadan çıxarılması üçün tam hərbi dəstək verəcəklər. Bununla da Rusiyanın cəbhə xəttində irəliləyişi və hücumu durdurula bilər. Hərbi dəstəkdən sonra isə Ukrayna qoşunlarının yeni hücumlar həyata keçirməsi mümkündür”.

Günay Rəsulqızı