“ABŞ Prezidenti Co Baydenin Ukraynaya Rusiya ərazisinə ATACMS taktiki ballistik raketləri ilə zərbələr endirməyə icazə verməsinin ardınca Böyük Britaniya və Fransanın da oxşar addımı atması 3 paytaxt arasında aparılan məxfi danışıqların nəticəsidir”.

Sfera.az xəbər verir ki, bunu Ukraynaya Rusiya ərazisinə raket zərbələrinin endirilməsinə verilən icazəni şərh edərkən politoloq Elxan Şahinoğlu bildirib.

Onun qənaətincə, London və Paris bu məsələylə bağlı Vaşinqtonun qərarını gözləyirdi.

“Ukrayna Prezidenti Volodimir Zelenski də amerikalı həmkarı Co Baydendən bu qərarı aylardır gözləyirdi”, - deyən E.Şahinoğlunun sözlərinə görə, Co Bayden isə bu qərarın verilməsi üçün prezident seçkilərinin başa çatmasını gözləyib:

“Bayden son ana qədər məsələni uzadırdı. Vitse-Prezident Kamala Harris prezident seçilsəydi, Ukraynaya Rusiya ərazisinə uzaq mənzilli zərbələr endirməsi qərarını o verməli olacaqdı. Harrisin məğlubiyyəti Baydenin planını pozdu. Belə olan halda, Bayden Prezident seçilən Donald Trampa son “pisliyini” etdi. Tramp Rusiya-Ukrayna müharibəsini dayandırmaq üçün plan hazırlayıb. O, yanvarın 20-də andiçmə mərasimindən sonra planını işə salacaqdı. Andiçmə mərasiminə hələ iki ay var. Ukrayna bu müddətdə Baydendən aldığı icazə müqabilində Rusiyanın içərilərindəki hərbi mərkəzlərə uzaqmənzilli raketlərlə zərbələr endirəcək. Tramp andiçmə mərasimindən sonra Kiyevə uzaqmənzilli raketlərlə zərbələr endirməsini qadağan etsə, bu, Ukraynanın Rusiya qarşısında zəif düşməsinə şərait yaradacaq və buna görə Amerikada Trampa qarşı ittihamlar artacaq. Vəzifəsini təhvil verməyə hazırlaşan Co Baydenə və Demokratlar Partiyasına da elə bu lazımdır”.

Vasif

Sfera.az