BMT-nin İqlim Dəyişikjliyi üzrə Çərçivə Konvensiyasının (UNFCCC) tərəfdaşı olan və olmayan qurumlarla birlikdə Qlobal İqlim Fəaliyyəti Gündəliyini irəliyə aparmaq olar.

Sfera.az xəbər verir ki, bunu noyabrın 11-dən başlayaraq noyabrın 22-nə qədər Bakıda keçiriləcək BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasının (COP29) iqlim üzrə yüksək səviyyəli lideri Nigar Arpdarai bildirib.

O, bu barədə COP29 çərçivəsində təşkil olunmuş Qlobal İqlim Fəaliyyəti ilə bağlı sessiyada danışıb.

"Dünyanın bir yerində iqlim dəyişikliyi ilə mübarizənin vacibliyini başa düşürlərsə, lakin dünyanın digər yerində biz bunu görmürüksə, o zaman öz missiyamızı tam yerinə yetirə bilmərik. Ekosistem hər kəsə məxsusdur. Bu qaydaları hətta beynəlxalq hüquqa daxil etməliyik ki, hər kəs oyunun qaydalarını bilsin. Yüksək Səviyyəli Çempion kimi əsas diqqətimiz özəl sektorun cəlb edilməsinə yönəlib, çünki biz qlobal iqlim fəaliyyəti və iqlim maliyyəsi haqqında danışırıq. Özəl sektor olmasa, biz irəli getməyəcəyik. İri korporasiyalar, eyni zamanda kiçik və orta müəssisələr "yaşıl keçid"ə inanmasalar, biz irəli getməyəcəyik. Hər kəsə ehtiyac var. Bizə vətəndaş cəmiyyəti lazımdır. Onların monitorinq sistemlərinə ehtiyacımız var. Bizə xeyriyyə təşkilatları lazımdır, bizə akademiya, gənclər lazımdır. Bu, qlobal fəaliyyətdə bir addım irəli gedə biləcəyimiz yeganə yoldur, çünki iqlim dəyişir", - deyə N.Arpadarai qeyd edib.