ABŞ-nin Rusiya-Ukrayna müharibəsindən əsas marağı nədir? - AÇIQLAMA
Rusiya-Ukrayna müharibəsi başlayandan bəri hər iki tərəfi də dəstəkləyən dövlətlər var. Dünyanın hegemon dövlətlərindən olan Amerika Birləşmiş Ştatları isə bu müddət ərzində Kiyevi dəstəkləyib.Lakin ABŞ-nin Ukraynaya yardımları fonunda hələ də Kiyevin mütləq qələbəsi mövzu obyekti deyil.
Maraqlıdır, ABŞ-nin Rusiya-Ukrayna müharibəsindən əsas marağı nədir?
Mövzu ilə bağlı Sfera.az-a açıqlama verən politoloq Məhəmməd Əsədullazadə bildirib ki, ABŞ nə Ukraynanın qalib gəlməsində, nə də Rusiyanın məğlub olmasında maraqlıdır.
Onun sözlərinə görə, ABŞ Rusiya-Ukrayna müharibəsindən öz geopolitik maraqlarını təmin etməklə Avropanı öz nəzarətində saxlayır, Rusiyanın qalib gəlməsinə imkan verməməklə isə onun resurslarını tükədərək fövqəldövlət iddiasının qarşısını alır:
“ABŞ Rusiyanın hərbi qüvvələrini kifayət qədər zəiflədib. Moskvanın Şimali Koreyadan kömək istəməsi də bunun bariz nümunəsidir. ABŞ-dən fərqli olaraq, Avropa dövlətləri vahid siyasi mövqe ortaya qoyub, Ukraynaya tam hərbi dəstək verib, Ukraynanın qalib gəlməsini təmin edə bilərlər. Hazırkı müharibə Avropanın təhlükəsizliyini və suverenliyini təhdid edir. Fransa Prezidenti Emmanuel Makron və Almaniya rəsmləri vahid Avropa ordusunun qurulmasından danışır. Çünki ABŞ-nin Ukrayna müharibəsindən yalnız öz geosiyasi məqsədləri üçün istifadə etdiyinin fərqindədirlər”.
Vaşinqtonun yeni siyasi nizamda bir qütblü sistemin inkişafı üçün Avropa ölkələri ABŞ-yə tam tabe olmalı, Ukrayna isə Rusiya və Avropa arasında bir baryer olmalıdır.
Politoloq qeyd edib ki, Rusiyanın fövqəldövlət olmaq planı və çox qütblü dünya sisteminin formalaşması üçün iddiaları indiki müharibənin başlanmasına gətirib çıxarıb:
“Kreml rəhbərliyi Rusiya Belarus və Ukrayna ittifaqı yaradıb, MDB ölkələrini də bu ittifaqa gətirəcəkdi. Kremlin post-sovet ölkələrini yenidən öz orbitinə qaytarmaq üçün yeni müharibəyə başlaması gözlənilirdi. Bu, qaçılmaz idi. Məhz bu muharibə Ukraynada baş verdi. ABŞ belə bir planın qarşısını almalı idi. ABŞ bunun qarşısını almaqla, Avropanın Rusiya ilə yaxınlaşmasının üstündən xətt çəkdi”.
M.Əsədullazadə vurğulayıb ki, Rusiya-Ukrayna müharibəsi yeni müstəvidə davam edəcək:
“Şimali Koreya ordusu müharibədə iştirak etdiyi üçün Çexiya prezidenti vətəndaşlarının Ukraynada döyüşməsinə icazə verdi. Eyni addımı Polşa və digər Avropa ölkələrinin də atması istisna deyil. Çünki Avropa ölkələri ABŞ-dən fəqrli olaraq müharibənin bitməsində maraqlıdırlar. Əgər Avropa ölkələri vahid şəkildə Ukraynaya tam dəstək olub Vaşinqtonun təlimatından kənarda müharibəni aparsalar, gələn ildən Rusiyanı danışıqlar masası arxasında əyləşdirə bilərlər”.
Firuzə Əliyeva
