Şimali Koreya əsgərlərinin müharibəyə cəlb edilməsi Rusiya ilə Ukrayna arasında gərginliyi artırıb. Sözügedən ölkənin 10 mindən çox hərbçisinin Rusiya ərazisinə gətirilməsi fonunda, Ukrayna Prezidenti Volodimir Zelenski də ölkəsində xarici vətəndaşların orduda hərbi xidmət keçməsi barədə sərəncam imzalayıb.

Bu proses necə nəticələnə bilər?

Mövzu ilə bağlı Sfera.az-a açıqlama verən politoloq Məhəmməd Əsədullazadə deyib ki, Zelenskinin son qərarı ilə Ukraynada əcnəbi döyüşçülərdən ibarət briqadalar yaradılacaq. Onun sözlərinə görə, hazırda hərbi əməliyyatlar Rusiya və onun müttəfiqlərinin lehinə işləyir:

“Bir neçə günə Kursk uğrunda həlledici döyüş başlayacaq. Bu isə Rusiya-Ukrayna müharibəsində yeni bir mərhələnin başlanğıcı olacaq. Qərb Rusiyanın Ukraynada qələbəsinə şərait yaradarsa, Vladimir Putin NATO-nu böləcək. Həmçinin o, Avropa İttifaqını özündən asılı vəziyyətə salacaq. Ümumiyyətlə, Putinin strateji planı NATO-nu parçalamaq və Şərqi Avropanı nəzarətə götürməkdən ibarətdir”.

Politoloq qeyd etdi ki, sözügedən proseslərdən sonra Çin də Tayvanı nəzarəti altına ala bilər:

“Rusiya Prezidenti Vladimir Putin ABŞ başda olmaqla, Qərb blokunun təhlükəsizlik arxitekturasına ciddi zərbə vurub. Zelenski isə Vaşinqtonun əməli hərbi yardımlar göstərməməsindən narahatdır.  Fikrimcə, ABŞ-də keçiriləcək prezident seçkiləri müharibənin gedişatına mənfi təsir edir. Avropa ölkələri də Rusiya qarşısında zəiflik nümayiş etdirir”.

Günay Rəsulqızı