"Simonyanın razılaşdırılmayan bəndlər barədə açıqlaması diplomatik hiylədir..." - ŞƏRH
“Azərbaycan və Ermənistan sülh sazişində 16 bənd üzrə tam razılığa gəlib. Sülhü bərqərar etməyin vaxtıdır”.
Bunu Ermənistan parlamentinin spikeri Alen Simonyan Parlamentlərarası İttifaqın 149-cu Assambleyasının ümumi müzakirələrindəki çıxışında deyib.
Simonyanın bu açıqlaması nəyə hesablanıb?
Sözügedən çıxışla bağlı Sfera.az-a açıqlama verən siyasi şərhçi Asif Nərimanlı deyib ki, razılaşdırılmayan bəndlər üzərindəki ziddiyyətli mövqe fonunda Simonyanın yalan danışdığı ehtimalı daha çoxdur. O qeyd edib ki, Azərbaycan sazişə paket formatında yanaşır:
“Ötən həftə Prezident İlham Əliyev Moskvada “Bütün məsələlər razılaşdırıldıqdan sonra razılığa gəlmək olar”, deyə bildirdi. Ötən bir həftədə nə Bakı, nə də İrəvanın mövqeyində korrektlər nəzərə çarpmayıb. Simonyanın bu iddianı irəli sürməsi diplomatik hiylə xarakteri daşıyır. Məqsəd beynəlxalq ictimai rəyi manipulyasiya etmək cəhdidir”.
A.Nərimanlının fikrincə, Ermənistan bu cür manevrlərlə razılaşdırılmayan bəndləri kənara qoymaq niyyətindədir:
“Eyni zamanda, İrəvan razılaşdırılmış bəndlər üzərində saziş imzalamaq hədəfinə beynəlxalq dəstək qazanmaq istəyir. Belə bir iddia isə Bakının cavab zərurətini yaradacaq. Bu da İrəvana “Azərbaycan sülhdən yayınır” rəyini yaratma imkanı verir”.
Günay Rəsulqızı
