İranın İsrailə raket hücumundan sonra bütün diqqətlər Təl-Əvivin anonsunu verdiyi cavab zərbəsinə yönəlmişdi. Lakin günlərdir, bu cavab baş tutmur, heç bir zərbə endirilmir. 

Maraqlıdır, İsrail İrana cavab zərbəsi vuracaqmı?

Bununla bağlı Sfera.az-a açıqlama verən politoloq Natiq Miri deyib ki, İsrailin İrana cavab zərbəsi olacaq, çünki söhbət İsrail dövləti və onu idarə edən Netanyahu hökumətinin imicindən gedir:

“Ancaq məsələnin ləngiməsindən çox, zərbənin hansı səviyyədə olması ilə bağlı veriləcək qərar önəmlidir. Bununla əlaqəli ABŞ öz xüsusi nümayəndəsini İsrailə göndərib və bu məsələ ciddi müzakirə olunur. Hətta İsrailə məhdud sayda, xüsusilə də neft və nüvə obyektlərinə zərbə endirilmədiyi təqdirdə müəyyən güzəşt vədləri verilir. Yəni həm texniki, həm maliyyə cəhətdən İsrailə yardımların oluna biləcəyi vədi var. Lakin ABŞ yeni bir müharibənin başlamasında maraqlı görünmür. Çünki seçkilər öncəsi belə bir münaqişənin başlaması bu illər ərzində Bayden administrasiyasının ən böyük uğursuzluğu kimi dəyərləndiriləcək. Yaxın Şərqdə HƏMAS-la İsrail arasında sülhün təmin olunması kontenkstində uzunmüddətli bir atəşkəs razılaşması layihəsi hazırlanmışdı. Ancaq ABŞ buna nail ola bilmədi, hətta bu məsələ bir az böyüyərək qonşu Livan dövlətinə sıçradı”.

Politoloq bildirdi ki, ABŞ indiki vəziyyətdə müharibənin olmasının əleyhinədir:

“Nəzərə almaq lazımdır ki, Netanyahu hakimiyyəti Bayden administrasiyasından daha çox Respublikaçıların namizədi olan Donald Trampa üstünlük verir. Çünki Netanyahu-Tramp dostluğu var. Bu mənada o, Benyaminə daha birmənalı və qətiyyətli dəstək verir, onun tərəfdarı kimi çıxış edir. Seçki öncəsi belə bir müharibənin başlaması isə Trampın xeyrinə olardı. Bunu Demokratlar da anlayır. Ona görə də Vaşinqton İsrail hökumətinə təzyiq edir ki, bu cavab əməliyyatı daha məhdud səviyyədə həyata keçirilsin. Qeyd etdiyim kimi, xüsusilə də neft və nüvə obyektləri vurulmasın, çünki bu hal dərhal adekvat cavabı ortaya qoyacaq. Bu da regionda yeni müharibənin alovlanmasına yol açacaq.  İsrailin cavabı olacaq, ancaq hansı səviyyədə olması İsrail-İran münasibətlərinin perspektivlərini müəyyən edəcək. Əgər məhdud sayda olacaqsa, İran buna dərhal reaksiya verməyəcək və yenidən qarşıdurma səngiyəcək. Yalnız İsraillə qarşıdurma proksi qüvvələr səviyyəsində olacaq. Yəni HƏMAS, Hizbullah, Suriya və digər bölgələrdə dirənişlər davam edəcək”.

Günay Rəsulqızı