Fariz İsmayılzadə: “Ermənistan yenidən silahlandırılır”

“Cənab Prezidentin parlamentdə çıxışı çox maraqlı oldu və çıxış əsasən təhlükəsizlik mövzusunda oldu”.

Sfera.az xəbər verir ki, bunu Milli Məclisin deputatı Fariz İsmayılzadə Beynəlxalq Münasibətlərin Təhlili Mərkəzində keçirilən “Azərbaycan Respublikasının Prezidenti cənab İlham Əliyevin Azərbaycan Respublikası Milli Məclisində çıxışının müzakirəsi: Müstəqil və prinsipial xarici siyasət” mövzusunda tədbirdə çıxışı zamanı deyib.

“Azərbaycan qələbədən sonra elə bir duruma düşüb ki, bizim həm imkanlarımız artıb, eyni zamanda, bizim risklərimiz, təhdidlərimiz artıb. Təsadüfi deyil ki, dünənki parlamentin iclasında yeni komissiya - Xarici müdaxilələrə və hibrid təhdidlərə qarşı müvəqqəti komissiyanın yaradıldı. Çox maraqlı, yerinə düşən təşəbbüsdür. Çünki biz ənənəvi olaraq hər zaman hərbi müdaxilələri, hərbi təhlükələri düşünürük. Amma artıq müasir dövrdə müharibələr də çox fərqli formatda aparılır. Biz görürük ki, yeni texnoloji üsulları istifadə edərək həm kibertəhlükəsizlik mövzusu aktuallaşıb, həm kiber hücumlar çoxalır, həm hibrid hücumlar çoxalır.

"Amma cənab Prezidentin çıxışında da bu xətt hiss olunurdu. Hiss olunurdu ki, Azərbaycana qarşı risklər artır” - deyə deputat əlavə edib:

“Ermənistanın silahlanması, Fransa, Hindistan tərəfindən digər Avropa ölkələri tərəfindən verilən silah dəstəyi, eyni zamanda Kanadanın adı çəkildi. Halbuki Kanada Avropa İttifaqının üzvü deyil, amma faktiki Kanada da bu proseslərə qatılıb. Yəni bütün bu məsələlər Azərbaycan üçün riskləri artırır.

Ermənistanı yenidən silahlandırır və bizim ümid etdiyimiz Cənubi Qafqazda əminamanlıq vizionu yavaş yavaş demək olar ki, aradan çıxır.

Onun əvəzinə yeni rəqabət, yeni silahlanma ortaya çıxır. Bu silah alveri yeni konfliktlər, yeni münaqişələr və gələcəkdə yeni risklərlə nəticələnəcək”.

“Bu şəraitdə Azərbaycanın xarici siyasəti necə olmalıdır?” - Fariz İsmayılzadə əlavə edib:

“Təsadüfi deyil ki, Azərbaycan BRİKS təşkilatına maraq göstərir. Eyni zamanda, Azərbaycan Orta Asiya ölkələri ilə strateji əməkdaşlıq qurur, biz hətta Çin ilə strateji əməkdaşlıq imzalamışıq. Yəni bütün bunlar bir növ Cənubi Qafqazda yeni geopolitik oyunun bazasını qoyur və təəssüf ki, bizim istədiyimiz 3+3 modeli hələ ki işləmir. Əksinə, Qərb və Şərq konfrantasiyası Cənubi Qafqazda özünü göstərir”.

Deputat bildirib ki, Prezidentin çıxışında bir dənə də çox maraqlı mövzu oldu.

O da bizim hərbi potensialımızın artırılması, o cümlədən daxili istehsal və daxili istehsala özəl sektorun cəlb olunması. Hesab edirəm ki, bu çox maraqlı bir məsələdir. Özəl sektor silah istehsalında daha aktiv rol oynaya bilər və eyni zamanda bizim iqtisadiyyatımıza böyük dəstək verə bilər. Nəzərə alsaq ki, ixrac potensialı arta bilər. Cənab Prezidentin çıxışında Qarabağın yenidən qurulması, sərhədlərimizin qorunması, orada aparılan quruculuq işləri çox böyük bir mövzu kimi əhatə olundu və bu prizmada. Mən xüsusilə qeyd etmək istəyirəm ki, Azərbaycanın təhlükəsizliyinin qorunması, güclənməsi üçün iqtisadi potensial mütləq olmalıdır, güclənməlidir”.