Rusiya ordusu səhər saatlarında Ukraynanın şimal-şərqindəki Sumı şəhərində sağlamlıq mərkəzini hədəfə alıb.

Sfera.az bildirir ki, bu barədə Ukrayna prezidenti Volodimir Zelenski açıqlama verib. O qeyd edib ki, hücumda 8 nəfər ölüb, 11 nəfər isə yaralanıb.

"Rusiya şəhərin xəstəxanalarından birini “Shahed” pilotsuz təyyarələri ilə vurdu. Ölənlərin ailələrinə və yaxınlarına başsağlığı verirəm. 113 nəfər isə xəstəxanadan təxliyə olunub. Hər kəs Rusiyanın nəyi hədəflədiyinə diqqət yetirməlidir. Onlar xəstəxanalara, mülki insanlara qarşı savaşırlar. Yalnız güc yolu ilə Rusiyanı sülhə məcbur edə bilərik. Bu yolda bizə dəstək olan hər kəsə təşəkkür edirəm”, - Zelenski bildirib.

Ukrayna Hərbi Hava Qüvvələrindən verilən açıqlamada isə Rusiyanın gecə boyu həyata keçirdiyi hücumda 73 pilotsuz uçuş aparatından 69-nun vurulduğu, 2 ballistik və 2 qanadlı raketdən də istifadə edildiyi bildirilib.

Qeyd olunub ki, Rusiyaya məxsus 15 PUA paytaxt Kiyev və ətrafında hava hücumundan müdafiə sistemləri tərəfindən məhv edilib.

Günay