Ötən gün Ərdoğan beynəlxalq ictimaiyyəti Şimali Kipr Türk Cümhuriyyətini tanımağa və iqtisadi əlaqələr qurmağa çağırıb. Bu barədə Türkiyə Prezidenti Birləşmiş Millətlər Təşkilatının (BMT) 79-cu Baş Assambleyasında çıxışı zamanı bildirib. O qeyd edib ki, Türkiyə və Şimali Kipr Türk Cümhuriyyəti (ŞKTC) adada sülhün və əməkdaşlığın tərəfdarıdır. 

Maraqlıdır, Azərbaycan da Şimali Kipr Türk Cümhuriyyətini tanıya bilərmi?

Bununla bağlı Sfera.az-a açıqlama verən politoloq Məhəmməd Əsədullazadə deyib ki, ümumiyyətlə, türk dövlətləri Ərdoğanın çağırışına qoşulmalıdırlar.

Onun sözlərinə görə, Azərbaycanın  Şimali Kipr Türk Cümhuriyyəti tanıması istiqamətdə isə heç bir siyasi və hüquqi problem yoxdur:

“Bu gün Yunanıstan Ermənistanla hərbi əməkdaşlıq edir, bu ölkənin silahlanmasına dəstək göstərir. Ona görə də Yunanıstanın bununla bağlı mövqeyi bizim üçün əhəmiyyət kəsb etməməlidir.  Digər tərəfdən, Azərbaycan artıq Qarabağ münaqişəsini həll edib. Ermənistan Azərbaycanın Qarabağ daxil olmaqla, ərazi bütövlüyünü tanıyıb. İki ölkə arasında sülh müqaviləsi bağlandıqdan sonra rəsmi Bakı Şimali Kipr Türk Cümhuriyyətinin müstəqilliyinin rəsmən tanınması istiqamətində addımlar atmalıdır”.

Politoloq qeyd edib ki, Qazaxıstan, Özbəkistan və Qırğızıstan da eyni analoji addımı ata bilər:

“Təbii ki, Türkmənistanın da bu prosesə qoşulması mümkündür. Türkiyənin güclənməsi və Türk Dövlətləri Təşkilatının nüfuzunun artırılması üçün Şimali Kipr Türk Cümhuriyyətinin müstəqilliyinin tanınması zəruridir”.

Günay Rəsulqızı