Ermənistanda arxiyepiskop Baqrat Qalstanyan bu günlərdə öz tərəfdarlarını toplayaraq tədbir keçirib. Tədbirdə hərəkatın əsas iki məqsədi kimi “Dağlıq Qarabağın” beynəlxalq gündəliyə qaytarılması və Azərbaycanda həbsdə olan keçmiş qondarma rejim nümayəndələrinin azad olunması əsas prioritet elan edilib. İlk etiraz aksiyası isə oktyabrın 2-nə təyin edilib. 

Bununla bağlı Sfera.az-a açıqlama verən siyasi şərhçi Kənan Novruzov deyib ki, müxalifətin əsas məqsədi “Dağlıq Qarabağ” və ora qayıdış narrativinin qorunub saxlanılması və inkişaf etdirilməsidir.

Şərhçinin sözlərinə görə, bu açıq-aydın o deməkdir ki, Ermənistan müxalifəti sülhün yox, yeni gərginliyin tərəfdarıdır: ““Dağlıq Qarabağ” məsələsinin yenidən gündəmə gəlməsi Azərbaycanın bağladığı səhifənin açılması deməkdir. Rəsmi Bakı buna səbirli, təmkinli yanaşmaz. Görünən odur ki, son ayda Ermənistan siyasi diskursunda “Dağlıq Qarabağ” narrativi daha çox müzakirə edilməyə başlayıb. Bu isə həm iqtidar, həm müxalifət düşərgəsində revanşistlərin canlanması barədə xəbər verir”.

K.Novruzov qeyd edib ki, bu tendensiya davam edərsə, gələcəkdə sülh gündəliyinin dondurulması istisna deyil:

“Diplomatlar susanda isə hərbçilər danışacaq. Əgər Ermənistan hakimiyyəti xarici havadarlarının və müxalifətin təzyiqi ilə revanşist mövqeyini davam etdirərsə, gələcəkdə yeni gərginlik yarana bilər. Bu isə Azərbaycanın Zəngəzur dəhlizini hərbi yolla açması ehtimalını istisna etmir”.

Günay Rəsulqızı