BMT Baş Assambleyasının 79-cu sessiyasının yüksək səviyyəli həftəsi Nyu-Yorkda 130-dan çox dövlət başçısı və 100-dən çox xarici işlər nazirinin iştirakı ilə başlayır. 

Sfera.az xarici KİV-ə istinadən xəbər verir ki, beş gün ərzində onlar münaqişələrin qarşısının alınması və həlli, iqlim dəyişikliyinin təsirləri ilə mübarizə, sosial-iqtisadi inkişaf və dövrümüzün digər qlobal problemlərini müzakirə edəcəklər.

Qarşıdan gələn həftə BMT-yə üzv 193 dövlətin, dünya qurumunda müşahidəçi statusuna malik Vatikan və Fələstinin, eləcə də Avropa İttifaqının nümayəndələri növbə ilə Baş Assambleyanın tribunasında çıxış edəcəklər.

Məlumata görə, Baş Assambleyanın 79-cu sessiyasının ümumi debatları BMT-nin Baş katibi Antonio Quterreş və 79-cu sessiyanın sədri Filemon Yanqın çıxışları ilə başlayacaq. Braziliya Prezidenti Luiz İqnasio Lula da Silva ənənəyə sadiq qalaraq söz alan ilk dünya lideri olacaq.

Braziliya prezidentini ABŞ lideri Co Bayden izləyəcək. ABŞ-nin vitse-prezidenti və Demokratlar Partiyasından prezidentliyə namizəd Kamala Harris Nyu-Yorkda keçiriləcək yüksək səviyyəli həftədə iştirak etməyi planlaşdırmır.

Debatın ilk günündə ümumilikdə 34 natiqin çıxışı planlaşdırılır. İkinci gün 40 dövlət başçısı çıxış edəcək.

Firuzə Əliyeva