Ərdoğan-Paşinyan görüşündə hansı məsələlər müzakirə olunacaq? - AÇIQLAMA

Türkiyə Prezidenti Rəcəb Tayyib Ərdoğan Ermənistan Baş naziri Nikol Paşinyanla görüşməyi planlaşdırır. Məlumata görə, görüş Nyu-Yorkda BMT Baş Assambleyası çərçivəsində baş tutacaq. 

Maraqlıdır, Ərdoğan və Paşinyan arasında hansı mövzular müzakirə oluna bilər?

Bununla bağlı Sfera.az-a açıqlama verən Beynəlxalq Münasibətlər və Diplomatiya Araşdırmaları Mərkəzinin sədri Samir Hümbətov deyib ki, Ərdoğanla Paşinyan arasında görüş baş tutacaqsa, birinci növbədə Türkiyə-Ermənistan münasibətləri müzakirə oluna bilər:

“Sərhədlərin açılması, tərəflər arasında diplomatik münasibətlərin qurulması və.s. istiqamətində ölkə başçıları arasında müzakirələr aparıla bilər.  Amma bununla paralel olaraq, Ermənistan-Azərbaycan arasında sülh müqaviləsinin imzalanması da görüşün əsas müzakirə predmentindən ibarət olacaq. Eyni zamanda Ermənistanın Türkiyəyə qarşı ərazi və əsassız soyqırımı iddialarından əl çəkməsi məsələsinin gündəmdə olma ehtimalı mümkündür”.

Samir Hümbətov bildirdi ki, Azərbaycanla sülh müqaviləsinin işlənib hazırlanması və onun təsdiq edilməsi məsələsində də Ankara rəsmi Bakı ilə eyni mövqedə olduğunu nümayiş etdirəcək:

“Ərdoğanın bu görüşdə qeyd etdiyim məsələni Paşinyanın diqqətinə çatdıracağı gözləniləndir. Ümumilikdə bölgə məsələləri, regiondan baş verənlər və Ermənistan ətrafında gedən son proseslər, xüsusilə də Qərb-Rusiya qarşıdurmasında İrəvanın silahlandırılması və.s kimi mövzular da görüşün əsas müzakirə predmenti ola bilər. Aydın məsələdir ki, Ermənistanın Qərbə çıxış imkanları formalaşır. Fikrimcə, burada Paşinyanın da əsas diqqət edəcəyi məsələ Türkiyə ilə sərhədlərin açılmasıdır”.

Günay Rəsulqızı