“ABŞ-də prezidentliyə namizəd Donald Trampa qarşı sui-qəsd cəhdində İranın əli ola bilər”.

Bu barədə Pentaqona yaxın olan “Rane” şirkətinin məruzəsində qeyd olunub. Bildirilib ki, İran ABŞ və Avropada prezident seçkilərinə qarşı kibercinayətlər həyata keçirir. İddia edilir ki, İrandan olan haker qrupları Trampa qarşı sui-qəsdlə bağlı paylaşımları maliyyələşdirir.

Sözügedən iddia doğru ola bilərmi?

Bununla bağlı Sfera.az-a açıqlama verən siyasi şərhçi Kənan Novruzov deyib ki, İranda müxtəlif səviyyədə kiberhücumlar təşkil etmək üçün imkanlar kifayət qədərdir:

“Bu gün sözügedən ölkə öz rəqiblərinə qarşı mübarizədə məhz bu üsula üstünlük verir. Yəni nəzəri baxımdan iddiaların həqiqətə uyğun olması mümkündür. Praktik baxımdan isə bu, o qədər də ağlabatan deyil. Nəzərə almaq lazımdır ki, Respublikaçılar Rusiya kimi, İrana münasibətdə də daha loyaldırlar. Bunu Trampın hakimiyyəti dövründə görmüşdük. Demokratlar isə, əksinə, həm Moskvaya, həm də Tehrana qarşı daha radikal mövqe ortaya qoyur. Bunu ABŞ-nin hazırkı hakimiyyətinin timsalında görürük. Belə olan halda, İranın Trampa qarşı sui-qəsd təşkil etməsi məntiqsiz görünür”.

Kənan Novruzovun sözlərinə görə, informasiyanın Pentaqona yaxın mənbə tərəfindən yayıldığını da nəzərə almaq lazımdır:

“Rəsmi Vaşinqtonun Tehrana münasibəti məlumdur. Bu mənada yayılan məlumatın sadəcə informasiya müharibəsinin tərkib hissəsi olması və ictimai rəyi çaşdırmaq üçün yayılması mümkündür”.

Xatırladaq ki, bu il Donald Trampa qarşı iki dəfə - iyunun 13-də və sentyabrın 15-də sui-qəsd cəhdi olub.

Günay Rəsulqızı

"Trampa qarşı sui-qəsd cəhdində İranın əli ola bilməz, çünki..." - AÇIQLAMA