Zelenski müharibəyə son qoyacaq yeni planı Tramp və Harrisə TƏQDİM EDƏCƏK

Zelenski Ukrayna savaşına son qoyacaq yeni plan üzərində işlədiklərini açıqlayıb.

Sfera.az bildirir ki, bu barədə o, Ukraynanın müstəqilliyinin 33-cü ildönümü ilə bağlı Kiyevdə keçirilən forumda çıxışı zamanı danışıb. Zelenski qeyd edib ki, planı gələn ay ABŞ Prezidenti Co Baydenə və prezidentliyə namizədlərə təqdim etməyə hazırlaşır.

“Plan tam hazır olduqdan sonra ABŞ prezidentliyinə iki namizəd Donald Tramp və Kamala Harrisə təqdim olunacaq. Bunun bizim köhnə 10 bəndlik sülh planımızla heç bir əlaqəsi yoxdur. Lakin son məqsəd Ukraynanın bu müharibədə qalib gəlməsidir. Ordumuzun avqust ayında Rusiyanın Kursk vilayətində keçirdiyi hərbi əməliyyat da bu yeni planın tərkib hissəsidir. Ümid edirik ki, plan payıza qədər dəqiqləşdiriləcək və ikinci Ukrayna sülh konfransına hazır olacaq”, - Ukrayna lideri bildirib.

Onun bu açıqlamasına Rusiyadan da reaksiya gəlib. Kremlin sözçüsü Dmitri Peskov “Kiyev rejiminin yeni planları ilk dəfə deyil. Hazırda Ukraynada kimin hakimiyyətdə olduğunu yaxşı bilirik. Müharibə bütün məqsədlərimizə çatana qədər davam edəcək” deyib.

Xatırladaq ki, bundan əvvəl Zelenski 15 noyabr 2022-ci ildə keçirilən G20 sammitində 10 maddədən ibarət “Sülh Formulu” planını açıqlamışdı.  Plan Rusiya qoşunlarının Ukrayna ərazisindən qeyd-şərtsiz və tam çıxarılmasını nəzərdə tuturdu. 

Günay