Deputatlığa namizəd Günay Ağamalı Salyan rayonunun Xocalı kəndində şəhid Elmir Məmmədovun və şəhid Ağamoğlan Kərimovun məzarlarını ziyarət etdi, onların ruhuna dualar oxudu.

Sfera.az xəbər verir ki, daha sonra Günay Ağamalı Xocalı kəndində hər iki şəhidin ailə üzvləri ilə görüşdü, onlarla səmimi söhbət etdi.

Görüşlərdə 44 günlük Vətən müharibəsində qəhrəmanlıqlar göstərərək Şəhidlik zirvəsinə ucalan Elmir Məmmədovun və Ağamoğlan Kərimovun döyüş yolundan söz açıldı.

G.Ağamalı Azərbaycan xalqının torpaqlarımızın azadlığı və bütövlüyü uğrunda qəhrəmancasına həlak olan qəhrəman Vətən övladları ilə hər zaman fəxr etdiyini söylədi. O, “bütün şəhidlərimiz bizim qürur mənbəyimizdir”- deyərək Elmir Məmmədovun və Ağamoğlan Kərimovun qısa və şərəfli ömür yolunun gənc nəsillər üçün örnək olduğunu söylədi.

Günay Ağamalı Cənab Prezident İlham Əliyevin və Birinci Vitse-Prezident Mehriban Xanım Əliyevanın şəhid ailələrinə və qazilərə göstərdikləri diqqət və qayğıdan da ətraflı danışdı. 

Şəhid Elmir Məmmədovun və şəhid Ağamoğlan Kərimovun valideynləri Günay Ağamalıya fəaliyyətində və qarşıdan gələn növbədənkənar parlament seçkilərində uğurlar arzulayaraq, ona öz xeyir-dualarını verdilər.

Günay Ağamalının 65 saylı Salyan- Biləsuvar-Neftçala seçki dairəsində seçicilərlə görüşləri davam edir.