"ABŞ inkar edir, bəs o hədəflər ordumuzun əlinə keçsə, nə olacaq?" - AÇIQLAMA

Ötən gün Ermənistan silahlı qüvvələri Naxçıvan istiqamətində Azərbaycan ordusunun mövqelərini yenidən atəşə tutub. Son zamanlar intensivləşən təxribat xarakterli addımlar isə xüsusilə sülh danışıqları istiqamətində müəyyən narahatlıqlar yaradır.

Bununla bağlı Sfera.az-a açıqlama verən siyasi şərhçi Zeynal Əmrəliyev deyib ki, Paşinyan özünü sülhün təşəbbüskarı kimi göstərməyə çalışsa da, digər tərəfdən erməni ordusu atəşkəsi pozur. 

Onun sözlərinə görə, burada iki nəticə ortaya çıxır:

“Ya Ermənistan Baş naziri Nikol Paşinyan öz ordusuna hakim deyil, hələ də erməni ordusuna “farağat” rus dilində verilir, ya da ABŞ-nin Ermənistana gətirdiyi hərbi birlik İrəvanı cəsarətləndirib. Rəsmi Vaşinqtonun Azərbaycandakı səfirliyi bütün görüntülərə rəğmən, amerika əsgərlərinin Ermənistanda olmadığını bildirir. Ermənistan müharibəyə başlamaq istəyir. Maraqlıdır, həmin savaş zamanı ABŞ-yə məxsus olan canlı və cansız hədəflər Azərbaycan ordusunun əlinə keçsə, səfir nə cavab verəcək?”.

Z.Əmrəliyev qeyd edib ki, amerikalı diplomatlar prezident İlham Əliyevin 44 günlük müharibə zamanı xarici mediaya verdiyi müsahibələri və Yunanıstan səfiri ilə dialoqunu təkrar izləsələr yaxşı olar:

“Ən azından ABŞ-nin Azərbaycandakı səfiri Mark Libbi hərbi mütəxəssisdir. Öz ölkəsini başa salmalıdır ki, bu işin sonrası var”.

Günay