Bu gün Azərbaycan Respublikasının Birinci vitse-prezidenti Mehriban Əliyevanın doğum günüdür.

Heydər Əliyev Fondunun və Azərbaycan Mədəniyyət Fondunun prezidenti, Yeni Azərbaycan Partiyası sədrinin birinci müavini, YUNESKO-nun və İSESKO-nun xoşməramlı səfiri Mehriban Əliyevanın bu gün 60 yaşı tamam olur.

Sfera.az ölkənin birinci xanımının həyat və fəaliyyəti ilə bağlı yazını təqdim edir:

Elə tarixi şəxsiyyətlər var ki, onlar haqqında fikir bildirmək, dəyərləndirmə etmək olduqca çətin olur. Çünki necə deyərlər, haradan başlayıb, harada bitirəcəyini bilmirsən. Müxtəlif sferalarda özünü doğruldan, xalqın sevgi və etimadını qazanan belə şəxsiyyətlərdən biri də ölkənin Birinci vitse-prezidenti xanım Əliyeva, özünün ifadəsi ilə desək, "Bizim Mehriban”dır...

Bəli, təsadüfi deyil ki, "Bizim Mehriban” ifadəsinə diqqət çəkdik. Xalqa müraciətinin sonunda hər zaman "Sizin Mehriban” imzasını qeyd edən Mehriban Əliyeva elə tək bu ifadə ilə, həqiqətən də, status fərqi olmadan cəmiyyətin bütün üzvlərinə doğmalığını göstərib və göstərməkdədir.

Qızıl Arslanın həyat yoldaşı Qətibə xanım, Uzun Həsənin anası Sara xatun, Şah İsmayıl Xətainin qızı Məhinbanu kimi qadınlar yetişdirən millətimiz müasir Azərbaycan dövləti üçün də Mehriban Əliyeva kimi vətənpərvər, ziyalı və zərif xanım yetişdirib...

Vitse-prezident kimi Mehriban...

2017-ci il fevralın 21-də Azərbaycan Respublikasının Birinci vitse-prezidenti vəzifəsinə təyin edilən Mehriban Əliyeva vəzifəsini icra etdiyi 7 il ərzində işinin öhdəsindən layiqincə gəlməyi bacarıb. Mehriban Əliyevanın vəzifəsinin icrasına başladıqdan qısa müddət sonra - 2017-ci ilin may ayında IV Ümumdünya Mədəniyyətlərarası Dialoq Forumu çərçivəsində "Qızlara təhsil verməklə zorakı ekstremizmə qarşı mübarizə” mövzusunda "dəyirmi masa”nın təşkil etməsi xalqın içərisindən biri olduğunun, cəmiyyətin mövcud problemləri haqqında bilgili olmasının və gender bərabərliyinə xüsusi önəm verməsinin göstəricisi idi. Yəni vəzifəyə təyin olunduğu ilk günlərdən etibarən, Mehriban Əliyeva vətəndaş amilini rəhbər tutaraq, həm ölkə daxilində, həm də beynəlxalq səviyyədə xalqı üçün, insanlıq üçün böyük mübarizəyə başladı.

Bundan başqa, vitse-prezident kimi fəaliyyət göstərməsinin 3-cü ili Vətən müharibəsinə təsadüf edən xanım Əliyeva bu sınaqdan da üzü ağ çıxaraq bütün müstəvilərdə olduğu kimi, Azərbaycan həqiqətlərinin dünyaya çatdırılmasında da önə çıxmağı bacardı.

Torpaqlarımızın işğalda olduğu müddət ərzində ən böyük siyasi mübarizələrdən birini də məhz birinci xanım verib. Belə ki, o, İkinci Qarabağ müharibəsindən əvvəl Qarabağın tarixini, münaqişənin mahiyyətini beynəlxalq ictimaiyyətə çatdırmaq üçün dünyanın aparıcı dövlətlərinin paytaxtlarında və böyük şəhərlərdə dünya ictimaiyyətinin diqqətini çəkərək müxtəlif elitaları bir araya toplamağı bacarıb. Bəli, Qarabağ həqiqətlərinin dünyaya çatdırılmasında və haqlı tərəfin sübut və faktlarla nümayişinin altında böyük bir imza var - Mehriban Əliyeva imzası...

Ali Baş Komandanın xanımı, ailəsinin Mehribanı

Normalda bir qadının işlə bağlı mühüm məsuliyyətləri olanda ailə, övladlar bir qədər arxa plana düşür. Biz bunu zamanla məşhur şəxslərin, tanınmış simaların övladlarının dilindən az eşitməmişik.Lakin ölkənin birinci xanımı ailənin onun üçün istənilən şəraitdə həyatın əsas mənası və stimulu, istinad nöqtəsi və güc mənbəyi olduğunu deyir. Təsadüfi deyil ki, biz bütün bu düşüncələrin fonunda Mehriban Əliyevanın timsalında bir xanımın həm yaxşı həyat yoldaşı və yaxşı ana, həm də nümunəvi ictimai şəxs ola biləcəyini görə bilirik. Bütün dövrlərdə Ali Baş Komandanın dəstəkçisi olan Mehriban Əliyeva övladlarına, nəvələrinə diqqət ayırmağı unutmayıb, qayğısını əsirgəməyib.Bütün bunları biz Prezidentin ailə üzvlərinin sosial şəbəkə hesablarındakı paylaşımlarında, mətbuata verdikləri açıqlamalarda da müşahidə etmişik.

Hər uğurlu kişinin arxasında bir qadın dayanır, deyirlər. Ölkə başçısı Prezident İlham Əliyevin xanımı Mehriban Əliyeva da məhz belə qadınlardandır.

Azərbaycanın birinci xanımı ən çətin situasiyalarda dövlət başçısının yanında olub, xalqın liderinin böyük məsuliyyətinin icrasında ona dəstək göstərib. Təsadüfi deyil ki, Prezident İlham Əliyev işğaldan azad olunan ərazilərimizə baxış zamanı, yenidənqurma işləri ilə tanış olarkən, işğaldan azad olunmuş torpaqlarımıza dönən vətəndaşlarımıza mənzillərinin açarlarının təqdim olunması zamanı da daim xanım Əliyeva ilə yan-yana dayanıb, bu mühüm səfərlərdə onunla birgə böyük işlərə imza atıb. Prezident Əliyev bütün bu dəstəyə, mənəvi gücə görə hər zaman xanımına təşəkkür edərək, onun fəaliyyətini yüksək qiymətləndirib. Beləliklə, biz ölkə başçısının ailəsi timsalında nümunəvi ailə modelini görə bilirik.

Vətən müharibəsinin Mehribanı...

Dövlət başçısı İlham Əliyevin siyasi əqidəsinin davamçısı olan Mehriban Əliyeva demək olar ki, fəaliyyətinin bütün dövrlərində şəhid və qazi ailələrinin həyat səviyyəsinin yaxşılaşdırılması istiqamətində mühüm işlər həyata keçirib. Prezident İlham Əliyev və Mehriban Əliyevanın tapşırığı nəticəsində şəhid ailələri və qazilərimiz evlə təmin olunub.

Eyni zamanda Mehriban Əliyeva Vətən müharibəsi qazilərinin müalicə və reabilitasiyası üçün də əlindən gələni edərək, onların rahatlığının təmin olunmasında misilsiz xidmətlər göstərməkdədir. Birinci vitse-prezident Mehriban Əliyevanın rəhbərlik etdiyi Heydər Əliyev Fondu tərəfindən də bu kateqoriyadan olan insanlarla bağlı müxtəlif layihələr həyata keçirilir. Şəhid ailələri və müharibə ilə əlaqədar əlilliyi olan şəxslərə Zəfər əldə etdiyimiz 44 günlük Vətən müharibəsindən sonra 6 min, ümumən ötən dövrdə 14 800 mənzil və fərdi ev təqdim edilib. Postmüharibə dövründə şəhid ailələri üzvləri və müharibə veteranları olan 105 min şəxsə 118 min aylıq sosial ödəniş, 23,4 min şəxsə birdəfəlik ödəmə təyin olunub.Şəhid ailələri üzvləri və müharibə iştirakçıları olan 11 min şəxsə 66,5 min sosial-psixoloji dəstək və reabilitasiya xidməti göstərilib.Müharibə ilə əlaqədar əlilliyi olan 2182 şəxs 59,6 min reabilitasiya vasitəsi, o cümlədən 481 şəxs 587 ədəd yüksək texnologiyalı müasir protezlə təmin olunub.Şəhid ailələri üzvləri və müharibə iştirakçıları olan 22,5 min şəxsin məşğulluğu təmin edilib, o cümlədən 10,6 min şəxs özünüməşğulluq proqramına cəlb olunub.44 günlük Vətən müharibəsinin əbədiləşdirilməsi, şəhid və qazilərin qəhrəmanlığının əyani təsviri üçün yaradılan Zəfər muzeyində də Mehriban Əliyevanın imzası, yaradıcı ruhu var.

Qalib əsgərlərin anası, şəhidlərin yadigarlarının qoruyucusu, sirdaşı...

Vətən müharibəsi və antiterror əməliyyatından sonra Mehriban xanım qazilərimizlə və şəhid ailələri ilə görüşlərdə də Ali Baş Komandanı yalnız buraxmadı. O, qalib əsgərin anası, şəhidlərimizin yadigarlarının qoruyucusu və sirdaşı oldu. Şəhid analarını bağrına basdı, qazilərimizə "siz tək deyilsiniz!" mesajını verdi.

Hər görüşdə qazilərimizin ağrılarından, şəhid analarının dərdlərindən kövrəldi, göz yaşı axıtdı. Həssas qəlbli Mehriban xanım bütün Azərbaycanın anası olduğunu bir daha göstərdi.

İdmançıların Mehriban dəstəkçisi

Mehriban Əliyeva demək olar ki, bütün sahələrdə çalışan şəxslərə öz diqqət və qayğısını əsirgəməyib. Bu xüsusda biz xanım Əliyevanın idmançılarımıza dəstək ruhunu da xüsusi qeyd etmək istərdik. Mehriban Əliyeva dəfələrlə müxtəlif sahələrdə uğur qazanmış idmançılarımızı dəyərləndirərək onlarla görüşmüş, mənəvi dəstəyini ifadə etmişdir.

Bu etimad və dəstəyin nəticəsidir ki, idmançılarımız cənab Prezidentimizlə yanaşı birinci xanımı da özlərinə arxa, dayaq və əsl dost bilirlər. Mehriban xanım hər bir idmançımızın uğurunu yüksək qiymətləndirir. Bu qiyməti biz birinci xanımın idmançılarımızı qazandıqları uğura görə şəxsən təbrik etməsində və onları daima diqqətdə saxlamasında da görürük.

Uşaqların Mehriban dostu...

Türkiyə Cümhuriyyətinin qurucusu Mustafa Kamal Atatürk "Vətəni qorumaq uşaqları qorumaqla başlayar", deyib. Doğrudan da,  insanlıq cəmiyyətin qurucusu, gələcək memarı olan uşaqları qorumalı, onları sevməlidir.

Mehriban Əliyevanın rəhbər olduğu Heydər Əliyev Fondunun əksər layihələri, istər təhsil sahəsində, istərsə də səhiyyə sahəsində məhz uşaqlara istiqamətlənib. Xanım Əliyeva bu layihələrə xüsusi diqqət ayırır. Onun qayğıya ehtiyacı olan uşaqları tez-tez ziyarət etməsi, onlarla söhbət edib, yemək bişirməsi, onlara göstərdiyi ana qayğısı xüsusilə təqdirəlayiqdir. Başqa cür ola da bilməz, çünki Mehriban xanım güclü siyasi kimliyi ilə yanaşı, həm də qayğıkeş və adı kimi mehriban anadır. 

Tarixin və mədəniyyətin Mehriban qoruyucusu

Hələ 1995-ci ildə "Azərbaycan Mədəniyyətinin Dostları” Xeyriyyə Fondunu yaradaraq mədəniyyət və incəsənətin inkişafında çoxşaxəli işlər görən Mehriban Əliyevanın milli-mənəvi dəyərlərimizin qorunub-saxlanılması və yaşadılmasında mühüm xidmətləri də danılmazdır. 

Mədəniyyətlərarası dialoqun təşkili və təşviqi istiqamətində Heydər Əliyev Fondunun BMT-nin ən mötəbər qurumlarından olan UNESKO ilə əlaqələrini xüsusilə qeyd etmək lazımdır. Mehriban xanım Əliyevanın fəaliyyəti nəticəsində Azərbaycan muğamı, aşıq və tar ifaçılığı sənəti, Azərbaycan xalçası və kəlağayısı UNESKO-nun Qeyri-Maddi Mədəni İrs Siyahısına daxil edilib.

Bundan başqa, qədim və zəngin Azərbaycan tarixinin mücəssiməsi olan Qobustan kompleksinin 2007-ci ildə UNESCO-nun Mədəni İrs Siyahısına daxil edilməsini də xüsusilə qeyd etmək yerinə düşər. Qobustan abidələrinin bu cür yüksək səviyyəli siyahıya daxil edilməsi birmənalı şəkildə məhz Mehriban xanımın danılmaz xidmətidir. UNESKO və İSESKO-nun xoşməramlı səfirinin tarixi bayramımız olan Novruz bayramının, hər naxışında tarix yatan Azərbaycan xalçası kimi mədəniyyət nümunələrinin də UNESKO-nun Mədəni İrs Siyahısına salınmasında birbaşa rolu var.

Bütünlüklə tarix, zəngin mədəniyyət qoxuyan Azərbaycanın bundan sonra da Mehriban Əliyevanın rəhbərlik etdiyi Heydər Əliyev Fondu sayəsində dünyanın mədəni irs siyahısında daha dayanıqlı, işıqlı mövqe tutacağından şübhə duyulmur.

Bu, siyasi, ictimai və ana kimliyi ilə Mehriban Əliyevadır. Mehriban xanım siyasi xadim və Azərbaycan vətəndaşı kimi çox uğurlara imza atıb, çox zirvələr fəth edib. Lakin hamımız yaxşı bilirik ki, zirvələrlə yanaşı qəlbləri fəth etmək də önəmlidir.  Mehriban xanım nəcib, qayğıkeş əməlləri ilə Azərbaycan Xalqının qəlbini fəth edib.

Bəli, O, "Bizim Mehribanımız"dır!

Sfera.az saytının kollektivi dərin hörmət, sevgi və ehtiramla Azərbaycanın birinci xanımını, Meribanını təbrik edir, ona bütün işlərində uğurlar arzulayır.

Yolunuz uğurlu və işıqlı olsun, əziz Mehriban xanım!