Bu gün 90 saylı Ağsu Seçki Dairəsindən deputatlığa namizəd, Ədalət, Hüquq, Demokratiya Partiyası (ƏHD) sədrinin müavini Elçin Mirzəbəyli Ağsu rayonunun Gəgəli kəndində və Ağsu şəhər Mədəniyyət və istirahət parkında seçicilərlə görüşüb.

Sfera.az xəbər verir ki, Gəgəli kəndində keçirilən görüşdə seçicilər qarşısında çıxış edən deputatlığa namizəd Elçin Mirzəbəyli bildirib ki, müstəqillik tariximizdə parlament seçkiləri ilk dəfədir ərazi bütövlüyü, suverenliyi təmin edilmiş Azərbaycanda keçirilir və bunun böyük mənəvi və siyasi əhəmiyyəti var.

Bizə tarixi Zəfərimizi bəxş edən insanlara dərin minnətdarlıq hissini dilə gətirən deputatlığa namizəd qeyd edib ki, qələbədən və suverenliyimizin bərpasından sonra yeni bir şərait yaranıb və ölkə həyatının bütün sahələrində çalışan insanlar öz fəaliyyətlərini böyük Zəfərin ruhuna uyğun şəkildə həyata qurmalıdırlar. Elçin Mirzəbəyli vaxtilə Qafqaz İslam Ordusunda, daha sonra isə Azərbaycan Xalq Cümhuriyyətinin ordusunda Gəgəli obasının 6 sakininin də xidmət etdiyini xatırladıb, ötən əsrin əvvəllərində erməni quldur dəstələrinin, terrorçuların yuxusuna haram qatan Gəgəlili Səfərin həmkəndlilərinin birinci və ikinci Qarabağ müharibəsində də böyük fədakarlıq nümayiş etdirdiyini dilə gətirib. Sonra Elçin Mirzəbəyli, ona etimad göstəriləcəyi təqdirdə iqtisadiyyat, kənd təsərrüfatı, elm, təhsil, mədəniyyət və sosial sahələrdə irəli sürəcəyi təşəbbüslər haqqında Gəgəli kəndinin sakinlərinə ətraflı məlumat verib.

Daha sonra deputatlığa namizəd Gəgəli kəndindən olan seçicilərin çoxsaylı suallarını cavablandırıb, onları narahat edən məsələlərin həlli yollarından söz açıb.

Deputatlığa namizədin növbəti görüşü Ağsu şəhər Mədəniyyət və istirahət parkında keçirilib. Elçin Mirzəbəyli burada da öz seçki platformasından danışıb, seçicilərin suallarını cavablandırıb.