Günay Ağamalı fərdi yaşayış evində seçicilərlə görüşdü - FOTO/VİDEO
Deputatlığa namizəd Günay Ağamalı Salyan rayonunun fərdi yaşayış evində seçicilərlə görüşüb. Günay Ağamalının vəkilləri Əməkdar müəllim Fərqanə Cəbrayılova, Elçin Quliyev, könüllü Sudeyf Fərhadov namizədin tərcümeyi-halı və fəaliyyəti haqqında görüş iştirakçılarına ətraflı məlumat veriblər.
Sfera.az xəbər verir ki, görüşdə çıxış edən Günay Ağamalı səmimi münasibətə və qonaqpərvərliyə görə seçicilərə təşəkkürünü və minnətdarlığını bildirdi.
O, təbliğat-təşviqat kampaniyası çərçivəsində keçirdiyi bütün görüşlərdə ağsaqqallardan və ağbirçəklərdən, ziyalılardan, sadə insanlardan aldığı xeyir-duanın onda qürur hissi yaratdığını böyük məmuniyyətlə etiraf edib.
G.Ağamalı seçki plafatformasının əsas qayəsinin Salyan-Biləsuvar-Neftçala rayonlarında erkən nigah, peşə təhsili, şəhid ailələrinə, Vətən müharibəsi qazilərinə, yaşlı və kimsəsiz ahıllara diqqətin yetirilməsi, qadın və uşaqların hüquqlarının müdafiəsi, sahibkarlığın və özəl sektorun inkişafına dəstək və digər məsələlər olduğunu söyləyib.
G.Ağamalı Prezident İlham Əliyevin ölkəmizdə sahibkarlığın inkişafına göstərdiyi diqqət və qayğıdan da ətraflı söz açıb.
Seçkilərlə görüşün əsas devizi kimi: “Gəlin birlikdə millətimizə, dövlətimizə sədaqətlə xidmət edək” olduğunu deyən Günay Ağamalı deputat seçiləcəyi təqdirdə onların problemlərinin səlahiyyətləri çərçivəsində həll edilməsi üçün səylə çalışacağını vurğulayıb.
O, çıxışının sonunda seçiciləri qarşıdan gələn növbədənkənar parlament seçkilərində fəal iştirak etməyə çağırıb.
Səmimi keçən görüşdə seçicilər Günay Ağamalıya sentyabrın 1-də Milli Məclisə keçiriləcək növbədənkənar seçkilərdə uğurlar arzulayaraq, ona səs verəcəklərini bildiriblər.
Günay Ağamalının 65 saylı Salyan-Biləsuvar-Neftçala seçki dairəsində görüşləri davam edir.