"Ukraynanın Rusiya aviabazalarına hücumları uğurlu alınır, çünki..." - AÇIQLAMA
"Ukrayna Rusiya aviabazalarına hücumları davam etdirir. Növbəti hədəf Volqoqrad vilayətinin Oktyabrsk qəsəbəsində yerləşən “Marinovka” hərbi aerodromu olub".
Sfera.az bildirir ki, bunu siyasi şərhçi Şahin Cəfərli deyib.
Onun sözlərinə görə, yerli sakinlərin yaydığı videolar hücumun uğurlu alındığını göstərir:
“Ən azı aerodromda aviabombaların saxlanıldığı sursat anbarında partlayış baş verdiyi dəqiqdir. Təyyarələrə zərər dəyib-dəymədiyi sonrakı günlərdə peyk fotoları ilə müəyyənləşəcək. Avqustun 14-də Nijnıy Novqoroddakı “Savasleyka” aviabazasına hücum zamanı 1 ədəd MiQ-31 döyüş təyyarəsi və 2 ədəd İl-76 hərbi-nəqliyyat təyyarəsinin məhv edildiyi dəqiqləşib. Daha 5 təyyarənin zədə aldığı bildirilir”.
Siyasi şərhçi qeyd edib ki, Rostov vilayətinin Proletarsk rayonunda yerləşən, Rusiyanın Dövlət Ehtiyatları üzrə Federal Agentliyinə məxsus “Qafqaz” kombinatının yanacaq bazası 4 gündən çoxdur, yanır:
“Burada hər birində 5 min ton yanacaq olan 74 böyük çən var idi. Bunların 20-dən çoxu artıq partlayıb. Soyutma-söndürmə çalışmaları dayandırıldığı üçün digər çənlər də qızdıqca partlayır. Kursk əməliyyatına gəldikdə isə vilayətin Qluşkovsk rayonunda, Seym çayının cənub sahilində mövqe tutmuş Rusiya qüvvələrinin logistikası kəsilib. Çay üzərindəki 3 körpü vurulduqdan və quraşdırılan ponton körpülər dağıdıldıqdan sonra çayı ancaq üzərək keçmək mümkündür. Burada təxminən 2 min, bəzi məlumatlara görə 3 min Rusiya əsgəri faktiki olaraq mühasirə vəziyyətindədir”.
Günay